AQSh Moliya vazirligi Kubada 1959-yildan beri birinchi Amerika korxonasi ochilishini ma’qulladi

AQSh prezidenti ma’muriyati Kubada 1959-yildan beri birinchi Amerika zavodini ochish to‘g‘risidagi rejani ma’qulladi, deb xabar beradi “Vedomosti”.

Ikki tadbirkor — Xoras Klemmons va Sol Berentalning kompaniyasi o‘tgan haftada Moliya vazirligidan kubalik fermerlarning ehtiyojini qondirish uchun orolda kichik traktorlarni yig‘uvchi zavod qurishga ruxsat olgan edi.

Korxona Kuba hukumati xorijlik investorlarni jalb qilish uchun yaratgan alohida iqtisodiy hududda ishlashi kutilmoqda. Zavod yiliga 1000 ta traktor va qishloq xo‘jaligining boshqa uskunalarini ishlab chiqaradi.

Klemmons va Berental loyihaga kiritiladigan investitsiyani 5—10 million dollarga baholamoqda va ishlab chiqarish 2017-yilning I kvartalida boshlanishi rejalashtirilmoqda. Ular ehtiyot qismlarini AQShdan olib keladi.

Korxona ishga tushganda unda avvaliga 30 ta ishchi o‘rni yaratiladi, keyinchalik ishchilar soni 300 kishigacha yetishi mumkin. Zavod ishlab chiqargan, quvvati 25 ot kuchiga ega bo‘lgan traktorlarning narxi 10 000 dollardan baland bo‘lmaydi.

Zavodga Kuba ilohlaridan biri Oggun nomi beriladi.