АҚШ президенти маъмурияти Кубада 1959 йилдан бери биринчи Америка заводини очиш тўғрисидаги режани маъқуллади, деб хабар беради «Ведомости».
Икки тадбиркор — Хорас Клеммонс ва Сол Беренталнинг компанияси ўтган ҳафтада Молия вазирлигидан кубалик фермерларнинг эҳтиёжини қондириш учун оролда кичик тракторларни йиғувчи завод қуришга рухсат олган эди.
Корхона Куба ҳукумати хорижлик инвесторларни жалб қилиш учун яратган алоҳида иқтисодий ҳудудда ишлаши кутилмоқда. Завод йилига 1000 та трактор ва қишлоқ хўжалигининг бошқа ускуналарини ишлаб чиқаради.
Клеммонс ва Беренталь лойиҳага киритиладиган инвестицияни 5—10 миллион долларга баҳоламоқда ва ишлаб чиқариш 2017 йилнинг I кварталида бошланиши режалаштирилмоқда. Улар эҳтиёт қисмларини АҚШдан олиб келади.
Корхона ишга тушганда унда аввалига 30 та ишчи ўрни яратилади, кейинчалик ишчилар сони 300 кишигача етиши мумкин. Завод ишлаб чиқарган, қуввати 25 от кучига эга бўлган тракторларнинг нархи 10 000 доллардан баланд бўлмайди.
Заводга Куба илоҳларидан бири Оггун номи берилади.
Изоҳ (0)