Britaniyalik talaba qiz Saima Ahmad Nestle kompaniyasi ishlab chiqargan KitKat batonlaridan sakkizta o‘ramini xarid qilib, ularning hech biridan vafli topa olmagach, kompaniyadan umrbod shokolad bilan ta’minlashni talab qildi. Bu haqda The Daily Mail xabar beradi.
Londonning Kings kolleji huquqshunoslik fakultetining ikkinchi kurs talabasi 20 yoshli Saimaning so‘zlariga qaraganda, u yaroqsiz shokolad batonchasini 2015-yilning dekabr oyida ikki funt sterlingga (2,8 dollar atrofida) xarid qilgan. “Ular (Nestle) KitKat’ning noyob tarkibini reklama qiladi, lekin men sotib olgan narsadan juda ta’bim xira bo‘ldi”, — deydi qiz.
Saimaning ta’kidlashicha, faqat KitKat’da “vafli va shokoladning o‘ziga xos birikmasi” reklama qilinadi va u aynan shunaqasini yoqtirgan.
Talaba Nestle’ga yo‘llagan maktubida kompaniya undan uzr so‘rashiga va bundan keyin “mahsulotining sifatiga ko‘proq e’tibor berishiga” umid qilgan. U Nestle’ga bo‘lgan ishonchini yo‘qotganligi hamda unga moddiy va ma’naviy zarar yetganligini ta’kidlagan.
Saima, shuningdek, kompaniyadan sifatini nazorat qilib turish uchun unga KitKat shokoladlarini umrbod tekin yetkazib turishni talab qilgan. Talaba kompaniya uning talablarini bajarmagan taqdirda, “yuridik choralar” ko‘rish bilan tahdid qilgan.
Izoh (0)