Rossiya avtosalonlarida GM Uzbekistan ishlab chiqargan Ravon R2 paydo bo‘ldi

Moskva shahridagi va Rossiyaning 16 hududidagi avtosalonlarda GM Uzbekistan tomonidan ishlab chiqarilgan Ravon R2 (Chevrolet Spark) xetchbeklari paydo bo‘ldi. Bu haqda “VladTime.ru” xabar bermoqda.

Rossiyalik xaridorlar avtomobilni bahorning birinchi oylaridan sotib olishi mumkin bo‘ladi. Hozirgi vaqtda mashina Rossiya yo‘llarida so‘nggi sinovlardan o‘tkazilmoqda.

Ravon R2’ning narxi va texnik o‘ziga xosliklari avtomobil savdosi rasman boshlanishi arafasida ma’lum qilinadi, deyiladi nashr xabarida.

Eslatib o‘tamiz, GM Uzbekistan 2015-yil oktabrida asosan Rossiya bozori uchun mo‘ljallangan Ravon brendi taqdimotini o‘tkazgan edi. Taqdimot davomida Ravon Nexia (T250 platformasidagi yangi model), Ravon Matiz (Chevrolet Matiz), Ravon R2 (Chevrolet Spark) va Ravon R4 (Chevrolet Cobalt) namoyish etilgandi.