Samvel Babayan: Iroq kuchli jamoa, ammo uni mag‘lub etishimiz shart
Futbol bo‘yicha O‘zbekiston olimpiya terma jamoasi bosh murabbiyi Samvel Babayan Qatarda davom etayotgan U-23 Osiyo chempionati guruh bosqichi navbatdagi tur uchrashuvlari doirasida 16-yanvar, shanba kuni Iroqqa qarshi kechadigan o‘yin oldidan “Uff.uz” saytiga intervyu berdi. Suhbat avvalida chempionat guruh bosqichi 1-turidagi Janubiy Koreyaga qarshi kechgan uchrashuv yana bir bor yodga olindi.
— Kozak va Fomin markaziy himoyachi emasligi aytilgan bo‘lsa-da, har ikkisi ham bu chiziqda avvaldan o‘ynab kelgani, o‘ynaganda ham ko‘ngildagidek harakat qilganini aytishim lozim. To‘g‘ri, ular har doim ham bu chiziqda harakat qilmagan, ammo bu qarorni qabul qilishga majbur bo‘ldik. Agarda Odil Hamrobekov va Bobur Yo‘ldoshev borasida muammo paydo bo‘lmaganda, himoyadagi xatolar bu qadar og‘riqli bo‘lmas edi.
— Janubiy Koreya terma jamoasi hujumdagi o‘yinimizni yaxshi o‘rgangani ko‘rinib qoldi. Bunga qarshi keyingi o‘yinlarda qanday tadbir qo‘llaysiz?
— Janubiy Koreyaga qarshi kechgan uchrashuv faqat natija tomonlama ko‘ngilsiz bo‘ldi, ammo futbolchilarim namoyish etgan o‘yinga aslo e’tiroz bildira olmayman. Biz kuchli raqibga qarshi o‘ynadik, ammo o‘z vaqtida pressing qo‘lladik va ular avvaldan o‘ylab qo‘ygan rejalarini amalga oshira olmadi. Ular o‘zlari odatlangani singari 10 daqiqalab to‘pni nazorat qilolmadi. Agar hakamning o‘ta qo‘pol xatolari bo‘lmaganda bu o‘yin qanday natija bilan yakunlanishi bahsli masala edi. Albatta, mag‘lubiyatda hakamni ayblash to‘g‘ri emas, ammo uning xatolari bevosita o‘yin natijasiga ta’sir o‘tkazsa-chi? O‘zingiz ham ko‘rdingiz, o‘yindan keyin o‘tkazilgan matbuot anjumanida o‘zimni arang bosib turdim.
— Tokaygacha hakamlardan jabr ko‘rish mumkin? Qachon biz ham rasman e’tiroz bildirishni o‘rganamiz?
— Bu borada ko‘nglingizni to‘q qilishingiz mumkin. Hakam borasida OFKga murojaat qilindi. Nasib qilsa, hammasi yaxshi bo‘ladi.
— Iroq bilan bo‘ladigan o‘yin haqida nima deya olasiz?
— Bu o‘yinda yutishimiz shart. To‘g‘ri, raqib kuchli, ammo nima bo‘lmasin, natijaga erishish shartligini hammamiz yaxshi tushunib turibmiz.
Eslatib o‘tamiz, O‘zbekiston va Iroq olimpiya terma jamoalari o‘rtasidagi U-23 Osiyo chempionati “C” guruhi 2-tur uchrashuvi 16-yanvar, shanba kuni Toshkent vaqti bilan 21:30 da boshlanadi.
