Toshkentda Bog‘ishamol va Mirzo Ulug‘bek ko‘chalarini birlashtiruvchi Kabel zavodi orqali o‘tgan yo‘l ochildi
Toshkentda Bog‘ishamol va Mirzo Ulug‘bek ko‘chalarini birlashtiruvchi yo‘lning yangi bo‘lagi foydalanishga topshirildi. Yangi yo‘lning suratlari “MyTashkent.uz” saytida e’lon qilingan.
Uzunligi 1,6 kilometr bo‘lgan yangi avtomobil yo‘li ilgari Kabel zavodiga taqalgan yo‘lning davomidir. Endi u zavodning qoq o‘rtasidan kesib o‘tib, Chamanbog‘ kichik ko‘chasi bo‘ylab, Botanika bog‘i yonidan o‘tadi va Bog‘ishamol ko‘chasiga chiqadi.
Natijadan Botanika bog‘idan boshlangan yo‘l Akademiklar shaharchasi orqali Buyuk Ipak yo‘li ko‘chasidan Qorasuv mavzesiga o‘tib, Toshkent tibbiyot akademiyasiga qadar davom etadi.
Yo‘lni “O‘zavtoyo‘l” kompaniyasining Toshkent Ko‘prik xo‘jaligini saqlashga ixtisoslashtirilgan ta’mirlash-foydalanish korxonasi (KXSITFK) qurib bitkazdi. Qurilish ishlari 1-avgustda boshlangan edi.
