O‘zbekiston Vazirlar Mahkamasi konsert-tomosha faoliyatini muvofiqlashtirish va nazorat qilish, madaniy-ommaviy tadbirlarni o‘tkazish, badiiy jihatdan yuksak musiqa asarlarini yaratish sohasidagi ishlarga mas’ul vazirliklar va idoralar faoliyatini tanqid qildi, deb yozadi “Gazeta.uz”.
Hukumatning 9-dekabr kungi “Konsert-tomosha faoliyatini amalga oshirish tartibini yanada takomillashtirish chora-tadbirlari to‘g‘risida”gi qarori (pdf)da Madaniyat va sport ishlari vazirligi, “O‘zbeknavo” estrada birlashmasi, Milliy estrada san’atini rivojlantirish va muvofiqlashtirish Kengashi, Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklarining, O‘zbekiston milliy teleradiokompaniyasining konsert-tomosha faoliyati sohasini muvofiqlashtirish va nazorat qilishga doir ishlari qoniqarsiz deb ataldi.
Qarorga ilova tarzida Konsert-tomosha faoliyatini litsenziyalash tartibi to‘g‘risida Nizom keltirildi, u O‘zbekiston Respublikasida va uning tashqarisida konsert-tomosha faoliyatini litsenziyalash tartibini, shuningdek, ijrochilarning reyting guruhlarini belgilash bo‘yicha mezonlar va malaka talablarini belgilaydi.
Madaniyat va sport ishlari vazirligiga konsert-tomosha va madaniy-ommaviy tadbirlarni chuqur va noformal g‘oyaviy mazmun bilan to‘ldirish, ijodiy uyushmalar, davlat va nodavlat tashkilotlari bilan mustahkam hamkorlik o‘rnatish topshirildi. “O‘zbeknavo estrada birlashmasiga litsenziya va ruxsatnoma talablari va shartlariga qat’iy rioya etilishini ta’minlash yuklandi.
Izoh (0)