Toshkent shahridagi “Tez tibbiy yordam” stansiyasiga bo‘ladigan umumiy qo‘ng‘iroqlarning 5 foizini yolg‘on chaqiruvlar tashkil etadi. Bu haqda stansiya bosh shifokori o‘rinbosari Elvira Yermanova “Darakchi” gazetasiga ma’lum qildi.
“Avval yolg‘on chaqiruvlar soni juda ko‘p edi, lekin raqam aniqlovchi telefonlar o‘rnatilgach, ko‘rsatkichlar tezda pasaydi. Bu, birinchidan, yolg‘on chaqiruvga havasmandlarni to‘xtatsa, ikkinchidan, dispetcherlik xizmati xodimlarida chaqiruvlarni kim amalga oshirayotganini bilish imkoni bo‘ladi”, — deydi Yermanova.
“Agar tibbiyot xodimlari chaqirilgan joyga quruqdan quruq borib kelsa, biz militsiya xodimlariga xabar beramiz. Bunday holatlarda Ma’muriy javobgarlik to‘g‘risidagi kodeksning 199-moddasiga binoan, eng kam ish haqining bir barobaridan uch barobarigacha miqdorida jarima solinadi”, — deya qo‘shimcha qildi shahar “Tez tibbiy yordam” stansiyasi vakili.
Avvalroq Toshkent shahrida 2015-yil davomida o‘t o‘chiruvchilarni 14 marta “aldashgani” haqida xabar berilgan edi.
Izoh (0)