O‘zbekistonda 2014-yilda OIV bilan og‘rigan ayollardan 559 bola dunyoga keldi

O‘zbekistonda OIVning onadan bolaga o‘tishining oldini olish bo‘yicha dastur amalga oshirilmoqda. Bu haqda, BMTning OITSga qarshi kurash bo‘yicha birlashgan dasturi (UNAIDS)ning O‘zbekistondagi vakolatxonasi maslahatchisi Komiljon Ahmedovga asoslanib, “Darakchi” gazetasi xabar bermoqda.

“2014-yilda OIV bilan og‘rigan ayollardan 559 bola dunyoga kelgan, shundan 545 nafari (97,4 foizi) antiretrovirus profilaktikaga ega bo‘lgan”, — deydi Komiljon Ahmedov.

Ma’lumot uchun, 2014-yilda O‘zbekistonda OIV infeksiyasi tarqalishiga qarshi kurashish bo‘yicha 2014—2016-yillarga mo‘ljallangan Davlat dasturi qabul qilingan.