Livanda Muammar Qaddafiyning o‘g‘li Gannibal ozod etildi

Livanda Liviyaning sobiq rahbari Muammar Qaddafiyning o‘g‘li Gannibal ozod qilindi. Politsiya shialar tomonidan o‘g‘irlab, Baalbek shahriga olib ketilgan Gannibalni Bayrutga olib keldi. Bu haqda Meduza xabar bermoqda.

11-dekabr, juma kuni “Al-Jadid” telekanali Gannibal Qaddafiy oyatulloh Sayyid Muso Sadrning taqdiri haqida bilganlarni bu haqda xabar berishga chaqirgan videoyozuvni efirga uzatdi. Eronlik va livanlik diniy yetakchi bo‘lgan oyatulloh 1978- yili, Liviyada Muammar Qaddafiy bilan uchrashganidan so‘ng yo‘qolgandi. Liviya Sadr va uning hamrohlari mamlakatni tark etganini bildirgan, biroq Livanda u Qaddafiy buyrug‘iga binoan o‘ldirilgani haqida taxminlar tarqalgan.

2011-yilda Gannibal, uning onasi va singlisi fuqarolar urushi boshlangan Liviyadan qochib, Ummondan boshpana topgandi. Uning qachon Livanga ko‘chib o‘tgani noma’lum. Ma’lumotlarga ko‘ra, Gannibal Livan fuqarosiga uylangan.