Toshkentda O‘rta Osiyodagi eng yirik kitob do‘koni ochildi

Toshkentda 2-noyabr, dushanba kuni “Kitob olami” nomli katta kitob do‘koni ish boshladi. “Anons.uz”ning qayd etishicha, bu O‘rta Osiyodagi eng yirik kitob do‘konidir.

Do‘kon nisbatan katta bo‘lib, unda bir necha — mumtoz adabiyot, chet el adabiyoti, she’riyat burchagi, qomuslar qatori, bolalar adabiyoti kabi ixtisoslashgan bo‘limlar bor. Bundan tashqari, ilmiy-ommabop va amaliy adabiyot bo‘limida sayohatnomalar, oshpazlik kitoblari, tarbiya, salomatlik, bog‘dorchilik haqida adabiyot va qo‘llanmalarni topish mumkin.

Hozircha do‘konda 5 mingdan ortiq nomdagi kitoblarni topish mumkin. Aksariyat kitoblar “O‘zbekiston”, Yangi asr avlodi, G‘afur G‘ulom nomidagi va Hello Nashr kabi noshirlik uylari tomonidan chop etilgan. Chet el nashriyotlaridan Moskvadagi “Eksmo” va “Olma”ning kitoblari ham bor. “Kitoblarning narxlari 10—200 ming so‘m atrofida”, — deyiladi nashr xabarida.

Bolalar adabiyoti bo‘limi o‘ziga xos jihozlangani va bezaklangani, adabiyotlarning xilma-xilligi bilan xaridor e’tiborini o‘ziga qaratadi. Kitob tokchalarida xalq ertaklarini ham, aka-uka Grimm va Pushkinning ertaklarini topish mumkin. “Xaridlardan so‘ng do‘konning o‘zida joylashgan mo‘jaz qahvaxonada mutolaaga berilish ham mumkin”, — deb yozadi internet-nashr.

Ma’lumot uchun, “Kitob olami” do‘koni Toshkent shahridagi Mustaqillik ko‘chasida, Konservatoriyaning eski binosi qarshisida joylashgan.