Xavfsizlik bo‘yicha mutaxassis Brayan Krebsga geroin jo‘natgan ukrainalik xakerga ayblovlar e’lon qilindi
13-oktabr kuni 29 yoshli xaker Sergey Vovnenkoga AQShning Nyuark shahri sudida bank ma’lumotlarini olib sotish, bank hisoblarini o‘g‘irlash va 13 mingdan ortiq buzib kirilgan tizimlardan botnet yaratish ayblovlari qo‘yildi, deya xabar bermoqda TJournal.
Fly, Flycracker va MUXACC1 taxalluslari ostida faoliyat olib borgan Vovnenko jurnalistlarga, shuningdek, xavfsizlik bo‘yicha mutaxassis Brayan Krebsni narkotiklar yordamida chalishga urinish bilan bog‘liq voqeaning bosh qahramoni sifatida ham tanish.
Krebs Vovnenko bilan birinchi marta 2013-yilda to‘qnash kelgan bo‘lib, o‘shanda u Twitter’da Krebsni shubhali linkni bosishga undab, uning jig‘iga tega boshladi. Fly o‘z blogida Krebsning kredit hisobotlari nusxalari, u yashaydigan joy xaritasi va uning uyi eshigining suratini joyladi.
Krebs surishtirib, Vovnenko moliyaviy firibgarlik masalalariga bag‘ishlangan forumda administrator bo‘lganini aniqladi va maxfiylik bilan forumga kirib, ukrainalik internet qora bozoridan geroin sotib olish uchun mablag‘ yig‘ayotganiga guvoh bo‘ldi.
Zarur mablag‘ni yig‘ib, Vovnenko geroinni Krebsga jo‘natdi va politsiyani chaqirdi, biroq u politsiyani jo‘natma haqida oldindan ogohlantirib qo‘ygandi. Hodisadan Vovnenko g‘azablandi va navbatdagi maktubida Krebsning rafiqasiga tahdid qildi.
Shundan so‘ng Krebs Fly’ning shaxsiyatini aniqlashga qattiq kirishdi va buni uddaladi ham. Xavfsizlik eksperti Vovnenko bilan endi yuzma-yuz uchrashish niyatida.
Xakerga qo‘yilgan barcha ayblovlar tasdiqlansa, u 30 yilgacha qamoq jazosi va million dollar miqdorida jarimaga hukm qilinishi mumkin. Hukm 19-oktabrda chiqarilishi kutilmoqda.
