Jamoatchilik oldida har doim po‘rim va soqoli olingan holda paydo bo‘ladigan Mark Rey ismli amerikalik feshn-fotosuratchi Manxettendagi ko‘p qavatli uy tomida, brezent ostida yashadi. Bu haqda “Korrespondent.net” xabar bermoqda.
56 yoshli Markni ko‘chada yoki mashhur model va dizaynerlar orasida ishlayotgan vaqtida ko‘rib, shunday parvarishlangan erkakning boshpanasi yo‘qligiga ishonish qiyin. 2008—2014-yillar oralig‘ida Rey ko‘p qavatli uy tomida yashadi, o‘z buyumlarini esa o‘zi a’zo bo‘lgan sport zal shkafchasida saqladi, shu yerda yuvinib, tarandi.
Rejissor Tom Uizerson Markning hayot tarixidan shu qadar ta’sirlandiki, uni ekranga ko‘chirishga qaror qildi. Uning “Homme Less” (“Uysiz”) nomli hujjatli filmi 2014-yili Nyu-York hujjatli filmlar festivalida namoyish etilib, kinotanqidchilarning ijobiy baholarini oldi.
Feshn-fotosuratchi Mark Rey o‘z faoliyatini 90-yillarning boshida boshlagan, dastlab omadi kelmagan — yiliga 10 ming dollar pul ishlab topgan — bu mablag‘ o‘zini boqish va kiyim-kechak sotib olishga bazo‘r yetgan, xonadonni ijaraga olish haqida esa gap-so‘z ham bo‘lmagan.
Mark uzoq vaqt davomida Nyu-Yorkdagi xostellarning birida yashagan, biroq taxtakanalar chaqib, uni qaqshatib yuborganidan so‘ng, 2008-yili bu yerni tark etgan. Do‘stlari unga muntazam ravishda tunash uchun joy taklif qiladi, biroq u yana taxtakanalarni deb bu takliflarni rad etadi — Rey o‘z kiyimlarida taxtakanalar qolganidan xavotirlanib, do‘stlarining uyini ham bu hasharot bilan zararlashdan qo‘rqadi.
2006-yili Mark Dazed jurnaliga ishga kirdi va hozirgi kunga qadar mazkur nashr uchun Nyu-Yorkdagi moda haftaligidan fotoreportajlar tayyorlaydi. Rey 2014-yil iyulida tomni tark etdi, biroq hali ham uning tayinli boshpanasi yo‘q.
Izoh (0)