Nigina Abduraimova Bangkokdagi tennis turnirining ilk davrasida Bayni mag‘lub etdi

O‘zbekistonning birinchi raqamli tennischisi Nigina Abduraimova 13-iyul kuni Tailand poytaxti Bangkok shahrida start olgan turnirdagi ishtirokini g‘alaba bilan boshladi, deb xabar qiladi “Olamsport.com”.

Mukofot jamg‘armasi 25 ming AQSh dollaridan iborat musobaqada uchinchi raqam ostida tasniflangan o‘zbekistonlik tennischi ilk davrada avstraliyalik Elison Bayga qarshi kortga chiqdi.

Uchrashuvda Abduraimova 6:3, 6:4 hisobida g‘alaba qozondi. Uning ikkinchi davradagi raqibasi 14-iyulda aniqlanadi. Har qanday holatda ham Nigina chorak finalga chiqish uchun tailandlik tennischilardan biri bilan to‘qnash keladi.

Saralash bahslarida ishtirok etgan yana bir o‘zbek tennischisi Vlada Yakshibarova esa yaponiyalik Kotomi Takaxataga 0:6, 2:6 hisobida yutqazib qo‘ydi. O‘z omadini juftliklar musobaqasida ham sinab ko‘rgan Yakshibarova yaponiyalik dugonasi Michika Ozeki bilan Tailand va Xitoy Taypeyi tennischilariga 3:6, 1:6 hisobida mag‘lub bo‘ldi. Nigina Abduraimova esa juftlikda qatnashmaydi.