“Tashabbus—2015” ko‘rik-tanlovining g‘oliblariga Spark avtomashinasi sovg‘a qilindi
“Turkiston” saroyida 11-iyun kuni O‘zbekiston Respublikasi Prezidenti sovrini uchun “Tashabbus – 2015” ko‘rik-tanlovining respublika bosqichi bo‘lib o‘tdi, deb xabar beradi “O‘zA”.
Tadbirkorlar, fermerlar va hunarmandlar O‘zbekiston prezidenti Islom Karimov tashabbusi bilan 1996-yildan buyon o‘tkazib kelinayotgan an’anaviy “Tashabbus” ko‘rik-tanlovining yakuniy bosqichida ishtirok etdi.
2015-yilda mamlakatning barcha hududlarida o‘tkazilgan an’anaviy ko‘rik-tanlovda 6,2 mingdan ziyod tadbirkor, fermer va hunarmand ishtirok etdi. Ko‘rik-tanlovning tuman, shahar va viloyat bosqichlarida g‘olib bo‘lgan 41 ishtirokchi mamlakat bosqichiga yo‘llanma oldi.
Tadbir O‘zbekiston Respublikasi Savdo-sanoat palatasi, Fermerlar kengashi, “Hunarmand” uyushmasi tomonidan tegishli vazirlik hamda idoralar hamkorligi va ko‘magida tashkil etildi. Ko‘rik-tanlovdan ko‘zlangan asosiy maqsad biznes muhitini jadal rivojlantirish, iqtisodiyotda xususiy sektorning roli va ahamiyatini oshirish, tadbirkorlarning kasb mahorati va bilim darajasini yuksaltirish borasida zarur shart-sharoitlar yaratishdan iborat.
“Turkiston” saroyida tashkil etilgan ekspozitsiya nafaqat hakamlar hay’ati va ishtirokchilar, balki tanlovga tashrif buyurganlarda ham katta qiziqish uyg‘otdi. Turli tovar va buyumlar – oziq-ovqat mahsulotlari, dori-darmonlar, maishiy texnika, kiyim-kechaklar, mebel, milliy zargarlik bezaklari, gilam va boshqa ko‘plab mahsulotlar O‘zbekistonning bunyodkorlik qudratini yorqin namoyon etdi.
G‘oliblar tanlovning “Yilning eng yaxshi tadbirkori”, “Yilning eng yaxshi fermeri” va “Yilning eng yaxshi hunarmandi” asosiy yo‘nalishlari, shuningdek, “Yilning eng yosh tadbirkori”, “Keksa tadbirkor – “Tashabbus” e’zozida”, “Yilning eng yaxshi tadbirkor ayoli”, “Yilning eng yaxshi innovatsion loyihasi”, “Yoshlar uchun eng ko‘p ish o‘rinlarini tashkil etgan tadbirkor”, “Mening Vatanim – mening faxrim”, “Yilning eng yaxshi mahsuloti” va boshqa qo‘shimcha nominatsiyalar bo‘yicha aniqlandi.
“Yilning eng yaxshi tadbirkori” yo‘nalishi bo‘yicha Toshkent viloyatidagi “Takro Osiyo” mas’uliyati cheklangan jamiyati rahbari Kamoliddin G‘iyosov g‘olib bo‘ldi. U rahbarlik qilayotgan korxona mato to‘qish va trikotaj mahsulotlarini ishlab chiqarish hamda eksport qilish bilan shug‘ullanadi.
Namangan viloyatilik Ilyosjon Botirov “Yilning eng yaxshi fermeri” deb topildi. “Rais-Sang” ko‘p tarmoqli fermer xo‘jaligida paxta va g‘alla, issiqxona mahsulotlari yetishtiriladi, chorvachilik bilan shug‘ullaniladi.
Xorazm viloyatilik Allazar Sa’dullaev “Yilning eng yaxshi hunarmandi”, deb e’lon qilindi. Xalq hunarmandi tarixiy yodgorliklar va ziyoratgohlarni ta’mirlash bo‘yicha ishlari bilan mashhur.
“Tashabbus – 2015” ko‘rik-tanlovi g‘oliblariga Prezident sovrini – Spark avtomobillari kaliti, ikkinchi va uchinchi o‘rin sohiblariga pul mukofotlari, maxsus nominatsiyalar sovrindorlariga qimmatbaho sovg‘alar topshirildi.
