Namangan viloyatining Pop tumanidagi Chodoq qishlog‘ida bolalar uchun madaniyat va istirohat bog‘ining qurilishi davom etmoqda, deb xabar beradi Uzbekistan Today.
Xiyobon hududi 1 gektar maydonni qamrab oladi, u oldin xarobazor bo‘lib yotgan joyda qurilmoqda.
Bog‘ Chodoqsoyga yaqin hududda joylashgan. Bu yerda qish faslida suv kam bo‘ladi, shuning uchun quruvchilar birinchi navbatda bahorda sersuv soyga aylanadigan Chodoqsoyning qirg‘oqlarini mustahkamladi.
Hozir bezakli to‘siqlar va ravoqli darvozani o‘rnatish ishlari yakunlanyapti. Tibbiy punkt, usti yopiq stol tennisi maydoni va ochiq amfiteatr binolarining poydevori qo‘yilgan.
Obodonlashtirish ishlarini olib borish ham rejaga kiritilgan: archalar, majnuntollar, manzarali tutlar, bir va ko‘p yillik gullar bog‘ ko‘rkiga yanada ko‘rk bag‘ishlaydi.
Chodoq qishlog‘idagi madaniyat va istirohat bog‘i 1-iyulda ochilishi rejalashtirilgan.
Izoh (0)