Rus pravoslav cherkovi vakili: Boshi o‘zga tanaga ko‘chirilgan odam qismangina inson bo‘lib qoladi
Moskva patriarxiyasi cherkov va jamiyat munosabatlari bo‘yicha Sinod bo‘limining rahbari Vsevolod Chaplin rejalashtirilayotgan inson boshini ko‘chirib o‘tkazish operatsiyasi haqida o‘z fikrlarini bildirdi, deb xabar bermoqda “Govorit Moskva” radiosi.
“Ushbu tajriba muvaffaqiyatli kechsa, ulkan ilmiy natija bilan birga axloqiy muammoga ham olib kelishi mumkin. Xudoga ishonmaydigan va abadiy hayot haqida orzu qiluvchi boylar sog‘lom va ongli odamlarning tanalaridan ham foydalanishi yoki ko‘chma tanaga ega bo‘lish uchun maxsus mavjudotlarni o‘stirishi mumkin. Boshi ko‘chirilgan odamning keyingi umrini esa hayot deb bo‘lmaydi. Boshqa tanaga ko‘chgan odam qismangina inson bo‘lib qolsa kerak. U biz hozirda biladigan odamga qandaydir teskari mavjudotga aylanadi”, − dedi ruhoniy.
Eslatib o‘tamiz, boshni ko‘chirib o‘tkazish bo‘yicha operatsiya uchun ilk nomzod Rossiyaning Vladimir shahrida yashovchi 30 yoshli dasturchi Valeriy Spiridonov bo‘lgani xabar qilingan edi.
