Toshkent shahrida Navro‘z yarmarkalari boshlandi. O‘zbekiston Respublikasi Vazirlar Mahkamasining Toshkent shahar dehqon bozorlarini tartibga solish, sanitariya holatini yaxshilash, asosiy turdagi oziq-ovqat va qishloq xo‘jaligi mahsulotlarining narxini barqaror saqlashni ta’minlashga qaratilgan qo‘shimcha chora-tadbirlar rejasi asosida tashkil etilgan ushbu yarmarkalar 5-aprelga qadar davom etadi. Bu haqda O‘zbekiston Milliy axborot agentligi xabar bermoqda.
“Sergeli dehqon bozori”da O‘zbekistonda ishlab chiqarilgan sifatli mahsulotlar xaridorlarga taqdim etilmoqda. “Agromir”, “Delight-neo”, “Master global plyus”, “Inom oyl-biznes baraka” mas’uliyati cheklangan jamiyatlari, “Yangiyo‘l sut” xususiy firmasi kabi korxonalar sarxil mahsulotlari bilan bozor fayzini yanada oshirmoqda.
“Poytaxtimizdagi 13 ta dehqon bozorida tashkil etilgan mazkur yarmarkalarda uyushmamiz tizimidagi 30 ga yaqin korxona o‘z mahsulotlari bilan ishtirok etmoqda”, – dedi Oziq-ovqat sanoati korxonalari uyushmasi eksperti Faxriddin Kalonov.
Toshkent shahar hokimligi, Oziq-ovqat sanoati korxonalari uyushmasi, “O‘zdonmahsulot”, “O‘zvinosanoatxolding” kompaniyalari tizimidagi korxonalar hamkorligida tashkil etilgan yarmarkada mahsulotlarni keng assortimentda yetkazib berish ta’minlangan.
Izoh (0)