Yangi HTC One M9 flagmani suratlari internetda tarqaldi

Internetda HTC’ning yangi One M9 flagman smartfoniga tegishli navbatdagi suratlar tarqaldi, deya xabar bermoqda “Rossiyskaya gazeta”. Bloger Evan Blass Tayvan kompaniyasining HTC One M9 va HTC One M9 Plus qurilmalari suratini e’lon qildi.

Suratlarga ko‘ra, yangi qurilmaning dizayni va hajmi bundan avvalgi M8 modelidan ko‘p farq qilmaydi. M9 tillarang, kumushrang va kulrang korpuslarda chiqariladi.

One M9 Plus fableti esa kichik modeldan “Uyga” (Home) tugmasi bilan farqlanadi, unga barmoq izi skaneri joylanishi kutilmoqda.

Turli bloglarda keltirilgan ma’lumotlarga ko‘ra, HTC flagmani to‘rt yadroli Snapdragon 805 protsessori, 3 Gb tezkor xotira bilan jihozlanadi va Android 5.0.2 Lollipop operatsion tizimida ishlaydi.

Avvalroq smartfon 5,5 dyuymli (2560×1440 pikselli) QuadHD-displey, 16 megapikselli kamera va Dolby Digital 5.1 akustika tizimiga ega bo‘lishi haqida xabarlar tarqalgan edi.

Ba’zi ma’lumotlarga ko‘ra, HTC yangi qurilmasini Barselonadagi MWC — 2015 ko‘rgazmasida taqdim etadi.