Янги HTC One М9 флагмани суратлари интернетда тарқалди

Интернетда HTC’нинг янги One М9 флагман смартфонига тегишли навбатдаги суратлар тарқалди, дея хабар бермоқда «Российская газета». Блогер Эван Бласс Тайвань компаниясининг HTC One М9 ва HTC One М9 Plus қурилмалари суратини эълон қилди.

Суратларга кўра, янги қурилманинг дизайни ва ҳажми бундан аввалги М8 моделидан кўп фарқ қилмайди. М9 тилларанг, кумушранг ва кулранг корпусларда чиқарилади.

One М9 Plus фаблети эса кичик моделдан «Уйга» (Home) тугмаси билан фарқланади, унга бармоқ изи сканери жойланиши кутилмоқда.

Турли блогларда келтирилган маълумотларга кўра, HTC флагмани тўрт ядроли Snapdragon 805 процессори, 3 Гб тезкор хотира билан жиҳозланади ва Android 5.0.2 Lollipop операцион тизимида ишлайди.

Аввалроқ смартфон 5,5 дюймли (2560×1440 пикселли) QuadHD-дисплей, 16 мегапикселли камера ва Dolby Digital 5.1 акустика тизимига эга бўлиши ҳақида хабарлар тарқалган эди.

Баъзи маълумотларга кўра, HTC янги қурилмасини Барселонадаги MWC — 2015 кўргазмасида тақдим этади.