1992-yilda Toshkent shahrida tug‘ilgan fuqaro yengil pul topish maqsadida o‘z ukasi va jiyani bilan jinoiy reja tuzdi, deb yozadi “Huquq” gazetasi.
Mazkur rejaga binoan, ular tanish yigitning orqasidan kuzata boshlashdi. Uning har doim bir manzilga tanish qizini kuzatib qo‘yish uchun kelishini bilib, o‘sha yerda uni kuta boshlashdi. Kutilganidek, ko‘p o‘tmay yigitning mashinasi ko‘rindi. U tanish qizi bilan xayrlashgandan so‘ng, jinoyatchilardan biri telefon qilib, qayerda ekanligini so‘radi. U manzilni aytishi bilan jinoyatchi o‘zi ham shu atrofdaligini aytib, tezda ko‘rishishdi.
Jinoyatchi yigitga Qibraydagi tanishidan 650 ming so‘m olib kelishi kerakligini aytadi. Shu zayl Qibray tomon yo‘lga chiqishdi. Yo‘lovchilar manzilga yetib kelganda jinoyatchi orqa o‘rindiqda o‘tirgan jiyaniga ishora qildi. U tuzilgan rejaga binoan, kamarni yigitning bo‘yniga tashlab, bo‘g‘a boshladi. Aka-ukalar ham uning oyoq-qo‘llarini mahkam ushlab, ura boshlashdi. Ularni yenga olmagan yigit ko‘p o‘tmay voqea joyida jon taslim qildi.
Insoniylik qiyofasini yo‘qotgan kimsalar jasadga tosh bog‘lab, shu yerdan oqib o‘tuvchi Salor kanaliga tashlab yuborishdi. Shunday qilib, yigitga tegishli Spark rusumli avtomashina, Nokia 3100 rusumli uyali telefon apparati hamda 110 ming so‘m pul bosqinchilik yo‘li bilan qo‘lga kiritiladi. Jinoyatchilar ertasi kuni yigitga tanish qizga tegishli o‘ta muhim hujjatlarni avtomashinadan topib olib, yoqib yuboradilar.
Ko‘p o‘tmay bir insonning umriga zomin bo‘lgan kimsalarning jinoiy qilmishi fosh etildi. Sud tomonidan ularga 18 yildan 20 yilgacha ozodlikdan mahrum etish jazosi tayinlandi.
Izoh (0)