2015-yil 27-yanvar kuni O‘zbekiston Respublikasi Markaziy saylov komissiyasi O‘zbekiston Milliy teleradiokompaniyasi, O‘zbekiston Milliy axborot agentligi, “Jahon” axborot agentligi bilan O‘zbekiston Respublikasi Prezidenti sayloviga tayyorgarlik ko‘rish va uni o‘tkazish jarayonini yoritish to‘g‘risida ikki tomonlama bitimlar imzoladi. Bu haqda O‘zbekiston Respublikasi Markaziy saylov komissiyasining rasmiy saytida xabar berildi.
Saylovlarning ochiqlik, oshkoralik va transparentlik kabi demokratik tamoyillarga muvofiq o‘tkazilishida ommaviy axborot vositalari muhim ahamiyat kasb etadi.
“O‘zbekiston Respublikasi Prezidenti saylovi to‘g‘risida”gi Qonunning 5-moddasi hamda Markaziy saylov komissiyasi tomonidan tasdiqlangan O‘zbekiston Respublikasi Prezidenti sayloviga tayyorgarlik ko‘rish va uni o‘tkazish bo‘yicha asosiy tadbirlar dasturiga muvofiq ommaviy axborot vositalari saylov jarayonini keng yoritadi.
Tadbirda Markaziy saylov komissiyasi raisi Mirza-Ulug‘bek Abdusalomov ta’kidlaganidek, o‘tgan yillardagi saylov kampaniyalari, ayniqsa, 2014-yilgi parlament saylovi mobaynida Markaziy saylov komissiyasi ommaviy axborot vositalari bilan saylov kampaniyasining barcha bosqichlari haqida jamoatchilikni xabardor qilish bo‘yicha katta tajriba to‘plagan.
Bitimlar saylov to‘g‘risidagi milliy qonun hujjatlari — O‘zbekiston Respublikasi Konstitutsiyasining tegishli qoidalarini, “Fuqarolar saylov huquqlarining kafolatlari to‘g‘risida”gi, “O‘zbekiston Respublikasi Prezidenti saylovi to‘g‘risida”gi, “O‘zbekiston Respublikasi Markaziy saylov komissiyasi to‘g‘risida”gi va saylov jarayonini tartibga soladigan boshqa normativ-huquqiy hujjatlarni aholi o‘rtasida tushuntirish bo‘yicha samarali faoliyat tashkil etishga qaratilgandir.
Imzolangan bitimlarni amalga oshirish doirasida O‘zbekiston Respublikasi Prezidentligiga nomzodlar uchun ularning saylovoldi dasturlari qoidalarini, mamlakat ijtimoiy-siyosiy, sotsial-iqtisodiy rivojlanishining muhim masalalariga taalluqli mustaqil nuqtai nazarlarini saylovchilarga, jamoatchilikka yetkazish uchun ommaviy axborot vositalaridan saylovoldi tashviqotini olib borish maqsadlarida foydalanishda, shu jumladan, teng hajmda efir vaqti va nashr maydoni ajratish yo‘li bilan keng va teng imkoniyatlar yaratishga alohida e’tibor beriladi.
Tomonlar O‘zbekiston milliy teleradiokompaniyasi tele- va radiokanallari, O‘zbekistonning yetakchi axborot agentliklari va bosma ommaviy axborot vositalari orqali o‘z vaqtida saylovga tayyorgarlik ko‘rish va uni o‘tkazish jarayoni haqida axborot berish va tarqatish masalalari bo‘yicha hamkorlik qiladi.
Izoh (0)