Qashqadaryo viloyati G‘uzor tumanidan bo‘lgan Og‘abek Oltiboyev quyosh energiyasi bilan harakatlanadigan universal traktor modelini yaratgan 11 yoshli sinfdoshiga havas qilib, qog‘oz va yog‘ochlardan turli buyumlar yasay boshlagan edi, deb xabar beradi “Nigoh” yoshlar axborot portali.
Og‘abek ilk bor qog‘ozdan samolyot yasab, uni sinf burchagiga qo‘ydi. Ustozi va do‘stlarining e’tirofidan ruhlanib, fazogir robot maketini yaratdi.
“Uning maketini yasashda penoplast, qog‘oz, yog‘och, gulqog‘oz va boshqa kerakli anjomlardan foydalanganman, — dedi u. — Ushbu robot inson sog‘ligi uchun xavfli bo‘lgan o‘ta sovuq yoki o‘ta issiq ob-havo sharoitida ishlashga mo‘ljallangan. Fazogir robot maketni yaratishdan maqsad uning qo‘liga o‘rnatilgan ozod va obod yurtimiz bayrog‘ini oyga qadashdir.
Ustozim aytganidek, robotni mukammal shaklda yaratish uzoq yillik mehnat talab etadi. Bunga hozirdanoq astoydil harakat qilyapman. Kelajakda jonajon O‘zbekistonimizning kosmosga uchadigan kemalari va unga yordamchi robotlar bo‘lishini juda xohlayman”.
“Og‘abek shu yil ‘Mustaqillik mening taqdirimda’ mavzusidagi ‘Barkamol avlod’ bolalar festivalining texnik ijodkorlik yo‘nalishida faol qatnashib keldi. Ushbu festival unda katta taassurotlar uyg‘otdi va o‘zida yangi g‘oyalar ham paydo bo‘ldi”, — dedi Saydullo Qoraboyev shogirdlari yutug‘idan faxrlanib.
Izoh (0)