Қашқадарё вилояти Ғузор туманидан бўлган Оғабек Олтибоев қуёш энергияси билан ҳаракатланадиган универсал трактор моделини яратган 11 ёшли синфдошига ҳавас қилиб, қоғоз ва ёғочлардан турли буюмлар ясай бошлаган эди, деб хабар беради «Нигоҳ» ёшлар ахборот портали.
Оғабек илк бор қоғоздан самолёт ясаб, уни синф бурчагига қўйди. Устози ва дўстларининг эътирофидан руҳланиб, фазогир робот макетини яратди.
«Унинг макетини ясашда пенопласт, қоғоз, ёғоч, гулқоғоз ва бошқа керакли анжомлардан фойдаланганман, — деди у. — Ушбу робот инсон соғлиги учун хавфли бўлган ўта совуқ ёки ўта иссиқ об-ҳаво шароитида ишлашга мўлжалланган. Фазогир робот макетни яратишдан мақсад унинг қўлига ўрнатилган озод ва обод юртимиз байроғини ойга қадашдир.
Устозим айтганидек, роботни мукаммал шаклда яратиш узоқ йиллик меҳнат талаб этади. Бунга ҳозирданоқ астойдил ҳаракат қиляпман. Келажакда жонажон Ўзбекистонимизнинг космосга учадиган кемалари ва унга ёрдамчи роботлар бўлишини жуда хоҳлайман».
«Оғабек шу йил ‘Мустақиллик менинг тақдиримда’ мавзусидаги ‘Баркамол авлод’ болалар фестивалининг техник ижодкорлик йўналишида фаол қатнашиб келди. Ушбу фестиваль унда катта таассуротлар уйғотди ва ўзида янги ғоялар ҳам пайдо бўлди», — деди Сайдулло Қорабоев шогирдлари ютуғидан фахрланиб.
Изоҳ (0)