Avstraliyaning Melburn shahrida Osiyo Futbol Konfederatsiyasining navbatdan tashqari Kongressi bo‘lib o‘tdi. Mazkur Kongressda tashkilot Nizomiga bir qator o‘zgartirishlar kiritildi, deb xabar beradi “Uff.uz”.
Kongressda O‘zbekiston Futbol Federatsiyasi Prezidenti Mirabror Usmonov, O‘FF Birinchi vitse-prezidenti Sardor Rahmatullayev va O‘FF Kotibiyati boshlig‘i Sanjar Rizayev ishtirok etdi.
Kongressda ishtirok etgan OFK delegatlari 2014-yil San Paulu shahrida bo‘lib o‘tgan OFK Kongressida qabul qilingan yangiliklarni tasdiqladi. Ular orasida eng asosiy masalalardan biri OFKga a’zo ayrim mamlakatlarni Janubiy va Markaziy Osiyo zonalariga ajratish bo‘ldi.
Unga ko‘ra, Markaziy Osiyo zonasida O‘zbekiston, Eron va futboli jadallik bilan o‘sib kelayotgan yana to‘rt terma jamoa (jami 6ta) ishtirok etsa, Janubiy zonada futboli rivojlanayotgan 7 ta jamoa ishtirok etadi.
Kongressda, shuningdek, OFK Ijroqo‘miga a’zo bo‘lgan ayollar sonini bittaga oshirish tasdiqlandi. Unga ko‘ra, yangi tashkil etiladigan beshinchi zonadan yangi Ijroqo‘m a’zosi tayinlanadi.
Kongressda so‘z olgan OFK prezideni Shayh Salmon Ibrohim Al Halifa Kongress ishtirokchilariga minnatdorchilik bildirdi va qabul qilingan qarorlar, o‘zgartirishlar Osiyo futboli rivoji uchun qo‘yilgan yangi qadam ekanini ta’kidladi.
“OFK Nizomiga kiritilgan yangi loyihalar, saylov komissiyasi tarkibiga o‘zgartirishlar kiritilishi va qabul qilingan bir qator yangiliklar Konfederatsiya rivoji uchun xizmat qilishiga shubham yo‘q. Nizomga o‘zgartirishlar kiritib, mintaqa futboli rivoji uchun birgalikda qadam tashlamoqdamiz, buning uchun barcha delegatlarga minnatdorchilik bildiraman”, — dedi OFK prezidenti.
Kongress yakunida OFK Ijoqo‘mi a’zolari soni qaytadan tasdiqlandi. Unga ko‘ra, OFK Ijroqo‘mi a’zolari endilikda 25 nafarni tashkil qiladi:
- OFK prezidenti (Shu o‘rinda FIFA vitse-prezidenti)
- OFK vitse-prezidentlari — 5 nafar
- OFKning FIFA Ijroqo‘midagi a’zolari — 3 nafar
- OFK Ijroqo‘midagi ayol delegatlar — 5 nafar
- OFK Ijroqo‘miga saylanadigan doimiy a’zolari — 11 nafar
Izoh (0)