Shu kunlarda o‘z qarorgohida yig‘in o‘tkazayotgan “Neftchi” futbol jamoasi safiga yangi o‘yinchilarning kelib qo‘shilishda davom etmoqda. Bu haqda “Stadion.uz” xabar berdi.
Kuni-kecha jamoa lageriga Abbos Maxstaliyev bilan Muhsin Ubaydullayevlar yetib kelishdi. O‘tgan yili Maxstaliyev birinchi davrani “Paxtakor”da o‘tkazib, keyinchalik “Andijon”da ijara asosida to‘p surgan edi. Ubaydullayev esa 2014-yilda butunlay “sherlar” ixtiyorida bo‘ldi.
Himoya chizig‘idagi raqobatni yanada kuchaytirish maqsadida, “Bunyodkor” a’zosi Shukurali Po‘latovni yana “Neftchi”ga qaytarish borasida ish olib borilmoqda. Yaqin orada 25 yoshli futbolchining mashg‘ulotlarga qo‘shilishi kutilmoqda. Shuningdek, dekabr oyida “Qaysar” yig‘inida ishtirok etgan Ro‘zimboy Ahmedov ham Farg‘onaga yetib keladi. Rahbariyat bilan uchrashuvdan so‘ng, ushbu hujumchining taqdiriga oydinlik kiritiladi.
Izoh (0)