Ukraina mamlakat atom elektr stansiyalariga AQShdagi Westinghouse kompaniyasining modernizatsiya qilingan yadro yoqilg‘isini yetkazib berishga ruxsat berdi. Bu haqda Ukrainaning Yadroni nazorat qilish davlat inspeksiyasi raisining birinchi o‘rinbosari Mixail Gashev ma’lumotiga asoslanib, Korrespondent.net xabar bermoqda.
“17-sentabr kuni men uch asosiy hujjatni imzoladim. Birinchisi Westinghouse’dagi modernizatsiya qilingan yoqilg‘ining ijobiy ekspertizasi bo‘lsa, ikkinchisi ekspertiza xulosasidir. Uchinchisi esa Westinghouse’ning modernizatsiya qilingan yoqilg‘isini Ukraina hududiga olib kirishga ruxsat beruvchi hujjatdir”, — dedi Gashev.
Uning so‘zlariga ko‘ra, “mazkur yoqilg‘i dekabrda Janubiy Ukraina atom elektr stansiyasiga keltirilib, taxminan dekabr oxirlari — yanvar boshlarida uchinchi blokka yuklanadi”.
Ma’lumot uchun, Ukrainaning “Energoatom” kompaniyasi Westinghouse bilan mamlakat AESlariga Amerika yadro yoqilg‘isini kiritish loyihasi bo‘yicha 2000-yildan buyon hamkorlik qilib kelmoqda. Joriy yilning 11-aprelida tomonlar yoqilg‘i yetkazib berish to‘g‘risidagi shartnomani 2020-yilgacha uzaytirdi.
Avvalroq “Energoatom” prezidenti Yuriy Nedashkovskiy ma’lum qilganidek, Westinghouse kompaniyasi ishlab chiqaruvchi TBC-WR yadro yoqilg‘isining 42 to‘plamdan iborat birinchi partiyasi Janubiy Ukraina AESlariga joriy yil so‘ngida yetkazib beriladi.
Izoh (0)