Hindiston filmlariga sertifikat berish markaziy boshqarmasi mamlakatda sobiq Bosh vazir Indira Gandining o‘ldirilgani bilan bog‘liq film namoyishini taqiqladi. Mazkur qaror jamiyat tartibiga solinayotgan xavfdan kelib chiqib, qabul qilindi. Bu haqda “ITAR-TASS” xabar bermoqda.
Tanqidchilarning fikricha, rejissor Ravinder Ravining “Jamiyat javohirlari” (Kaum De Heere) kinofilmi Gandining qotillarini maqtaydi. Bu esa aholi o‘rtasida norozilik tug‘dirishi mumkin.
Ma’lumot uchun, hindistonlik siyosatchi 1984-yil 31-oktabr kuni o‘z dargohida hukumat rahbari mudofaasi bilan shug‘ullanuvchi politsiya xodimlari Satvant Singx va Beant Singx tomonidan o‘ldirilgan. Ular qotillikni Gandining Amritsardagi Oltin ibodatxonaga qo‘shin jo‘natish to‘g‘risidagi qaroridan so‘ng amalga oshirgan. U yerga joylashib olgan jangarilar Panjob shtatini Hindistondan ajratishni talab qilayotgan edi.
Bosh vazir o‘limidan so‘ng mamlakatda boshlangan tartibsizliklar natijasida minglab kishi halok bo‘lgan.
Izoh (0)