BMT Xavfsizlik kengashi Ukrainadagi “Boing” halokati yuzasidan rezolyutsiya qabul qildi

BMT Xavfsizlik kengashi Ukraina sharqida qulab tushgan Malaysia Airlines kompaniyasi layneri bo‘yicha rezolyutsiya qabul qildi. Hujjatda bir qancha talablar mavjud, ularning bir qismi Ukrainadagi ayirmachilarga qaratilgan, deya xabar beradi Newsru.com.

Rezolyutsiyada “Boing-777” qulagan hududni nazorat qiluvchi guruhlardan u yerga YeXHT va boshqa tegishli xalqaro tashkilotlar vakillarini qo‘yish talab etilgan. Xavfsizlik kengashi bu bilan halokat bo‘yicha xolis xalqaro tergov olib borilishiga yo‘l ochib bermoqchi.

Shu maqsadda aviahalokat hududida barcha harbiy xatti-harakatlar to‘xtatilishi so‘ralgan.

Bundan tashqari, Xavfsizlik kengashi “Boing” qulashida aybdor bo‘lganlarni javobgarlikka tortish talabi bilan chiqqan.

Hujjat Kengash tomonidan bir ovozdan ma’qullandi.

Eslatib o‘tamiz, “Boing-777” Toshkent vaqti bilan 17-iyul, payshanba kuni 20:00 da Donetsk viloyati hududida halokatga uchradi. Samolyot qulashi natijasida bortdagi barcha 298 kishi halok bo‘lgan.

OAVlar avvalroq Ukraina sharqida harakat qilayotgan rossiyaparast ayirmachilar ixtiyorida yuqori balandlikda parvoz qilayotgan samolyotlarni urib tushirish imkonini beruvchi qurol paydo bo‘lgani, samolyot aynan o‘sha orqali urib tushirilgani haqida xabar tarqata boshladi.

Keyinroq Amerika razvedkasi Donetsk yaqinida halokatga uchragan Malayziyaning “Boing-777” layneri “yer — havo” sinfidagi raketa bilan urib tushirilganini tasdiqladi.

“Boing-777” qulagan joyda qora qutilar topildi. “Donetsk xalq respublikasi” rahbari Aleksandr Boroday MH-17 reysining ikkita qora qutilari Donetskda ekanini aytdi.

Uning so‘zlariga ko‘ra, Donetskdagi qora qutilar Fuqarolik aviatsiyasi xalqaro tashkiloti rasmiy vakillariga beriladi.