Toshkentda Olimpiya kuniga bag‘ishlangan yugurish musobaqasi o‘tkazildi
Alisher Navoiy nomidagi O‘zbekiston Milliy bog‘ida Olimpiya kuniga bag‘ishlab an’anaviy respublika yugurish musobaqasi bo‘lib o‘tdi, deb xabar bermoqda O‘zA.
Xalqaro Olimpiya qo‘mitasi shafeligida har yili dunyoning 200 dan ziyod mamlakatida tashkil etiladigan bunday musobaqa sihat-salomatlik va sport bayrami — zamonaviy Olimpiya harakatiga asos solingan kunga bag‘ishlab o‘tkaziladi.
An’anaviy yugurish musobaqasida Qoraqalpog‘iston Respublikasi, viloyatlar va Toshkent shahridagi saralash musobaqalaridan muvaffaqiyatli o‘tgan turli yoshdagi 800 nafardan ziyod sportchi va havaskor qatnashdi.
– Bu kabi turnirlar bizni yangi-yangi marralar sari ilhomlantiradi, – deydi yengil atletika bo‘yicha ko‘p karra mamlakat chempioni, Zulfiya nomidagi Davlat mukofoti sohibasi Yoqutxon Xolbekova. – Sport nafaqat musobaqalarda ishtirok etish uchun, balki kundalik hayotda, jismonan va ruhan sog‘lom bo‘lib yurishda muhim ahamiyatga ega.
Musobaqa g‘olib va sovrindorlariga sertifikatlar topshirildi.
