Futbol bo‘yicha O‘zbekiston milliy terma jamoasi sobiq hujumchisi Maksim Shatskix O‘zbekiston chempionatida kelishilgan o‘yinlar borligini ma’lum qildi. Bu haqda futbolchining “Interfutbol” gazetasiga bergan intervyusiga asoslanib, Stadion.uz xabar bermoqda.
“Bir paytlar hech qanday reklamasiz ham o‘zbekistonlik futbolchilar Rossiya klublariga o‘tishar edi. Hozir Odil Ahmedov va Vitaliy Denisovdan boshqa hech kim yo‘q. Vitya futboldagi asosiy tarbiyani Rossiya va Ukrainada oldi. Nima uchun hozir yorqin futbolchilar yetishib chiqmayapti? Bunga yetarlicha asoslar bor. Bilishimcha, O‘zbekiston chempionatida kelishilgan o‘yinlar bor va ko‘payib boryapti», — deydi Maksim Shatskix.
“Kelishilgan uchrashuvlari bor chempionat hech qachon kuchli bo‘lmaydi. Tabiiyki, bundan milliy terma jamoa ham aziyat chekadi. To‘g‘ri, oliy liga o‘yinlarini kuzatish uchun menda imkoniyat yo‘q. Ammo bu yerdagi do‘stlarim bilan gaplashganimda, ular O‘zbekiston chempionatidagi so‘nggi yangiliklardan meni boxabar qilib turadi. O‘FF va PFL birinchi galda ana shu kelishilgan bahslarni tomiri bilan qo‘porib tashlashga e’tibor qaratishi kerak. Aks holda hech qachon jahon chempionatiga chiqa olmaymiz”, – deya qo‘shimcha qildi hujumchi.
Maksim Shatskixning fikricha, bugun o‘smirlar va yoshlar o‘rtasidagi jahon chempionatlarida ishtirok etish imkoniyatiga ega bo‘layotgan o‘zbekistonlik futbolchilar ushbu musobaqalarda o‘zlarini ko‘rsatib, “o‘z taqdirlarini o‘zlari hal qilishlari kerak”. “Hozir futbolchilar orasida choyxonaga bormaydigani bo‘lmasa kerak”, — deya ta’kidladi Shatskix.
Maksim Shatskixning so‘zlariga ko‘ra, “kelishilgan o‘yinlar, hakamlarning uchrashuv natijasiga ta’sir qilishi bartaraf qilinmas ekan, futbolimizda oldinga siljish bo‘lmaydi”, deya futbolchidan iqtibos keltiradi “Kun”.
“Bu oqsash reytingga ham ta’sir qiladi. Mana bu yil O‘zbekiston nomidan birgina ‘Bunyodkor’ OChL guruh bosqichida ishtirok etdi. Bu narsa qit’adagi o‘rnimizni ko‘rsatib qo‘ydi. Futbolga to‘g‘ri yondashish vaqti allaqachon kelgan. Tadbirkorlik qilish uchun ham ma’lum miqdorda mablag‘ kiritish kerak. Bir so‘m sarflamasdan, ikki so‘m haqida o‘ylash noto‘g‘ri”, — dedi Maksim Shatskix.
Eslatib o‘tamiz, Maksim Shatskix 29-may kuni Ummon milliy terma jamoasiga qarshi bo‘lib o‘tgan uchrashuvda O‘zbekiston milliy termasi safidagi so‘nggi o‘yinini o‘tkazdi. Bu Shatskix uchun milliy termadagi 61-o‘yin bo‘ldi – o‘tgan o‘yinlar davomida u raqiblar darvozasiga 34 ta gol urib, milliy terma jamoa rekordchisi bo‘lib turibdi.
Futbolchi ayni vaqtda faoliyatini Ukrainaning “Goverla” klubida davom ettirmoqda. 35 yoshli Shatskix kamida yana bir mavsum futbol o‘ynashni rejalashtirmoqda.
Izoh (0)