Максим Шацких Ўзбекистоннинг ЖЧга чиқишига Олий Лигадаги келишилган ўйинлар халал бераётганини таъкидлади
Футбол бўйича Ўзбекистон миллий терма жамоаси собиқ ҳужумчиси Максим Шацких Ўзбекистон чемпионатида келишилган ўйинлар борлигини маълум қилди. Бу ҳақда футболчининг «Интерфутбол» газетасига берган интервьюсига асосланиб, Stadion.uz хабар бермоқда.
«Бир пайтлар ҳеч қандай рекламасиз ҳам ўзбекистонлик футболчилар Россия клубларига ўтишар эди. Ҳозир Одил Аҳмедов ва Виталий Денисовдан бошқа ҳеч ким йўқ. Витя футболдаги асосий тарбияни Россия ва Украинада олди. Нима учун ҳозир ёрқин футболчилар етишиб чиқмаяпти? Бунга етарлича асослар бор. Билишимча, Ўзбекистон чемпионатида келишилган ўйинлар бор ва кўпайиб боряпти», — дейди Максим Шацких.
«Келишилган учрашувлари бор чемпионат ҳеч қачон кучли бўлмайди. Табиийки, бундан миллий терма жамоа ҳам азият чекади. Тўғри, олий лига ўйинларини кузатиш учун менда имконият йўқ. Аммо бу ердаги дўстларим билан гаплашганимда, улар Ўзбекистон чемпионатидаги сўнгги янгиликлардан мени бохабар қилиб туради. ЎФФ ва ПФЛ биринчи галда ана шу келишилган баҳсларни томири билан қўпориб ташлашга эътибор қаратиши керак. Акс ҳолда ҳеч қачон жаҳон чемпионатига чиқа олмаймиз», – дея қўшимча қилди ҳужумчи.
Максим Шацкихнинг фикрича, бугун ўсмирлар ва ёшлар ўртасидаги жаҳон чемпионатларида иштирок этиш имкониятига эга бўлаётган ўзбекистонлик футболчилар ушбу мусобақаларда ўзларини кўрсатиб, «ўз тақдирларини ўзлари ҳал қилишлари керак». «Ҳозир футболчилар орасида чойхонага бормайдигани бўлмаса керак», — дея таъкидлади Шацких.
Максим Шацкихнинг сўзларига кўра, «келишилган ўйинлар, ҳакамларнинг учрашув натижасига таъсир қилиши бартараф қилинмас экан, футболимизда олдинга силжиш бўлмайди», дея футболчидан иқтибос келтиради «Кун».
«Бу оқсаш рейтингга ҳам таъсир қилади. Мана бу йил Ўзбекистон номидан биргина ‘Бунёдкор’ ОЧЛ гуруҳ босқичида иштирок этди. Бу нарса қитъадаги ўрнимизни кўрсатиб қўйди. Футболга тўғри ёндашиш вақти аллақачон келган. Тадбиркорлик қилиш учун ҳам маълум миқдорда маблағ киритиш керак. Бир сўм сарфламасдан, икки сўм ҳақида ўйлаш нотўғри», — деди Максим Шацких.
Эслатиб ўтамиз, Максим Шацких 29 май куни Уммон миллий терма жамоасига қарши бўлиб ўтган учрашувда Ўзбекистон миллий термаси сафидаги сўнгги ўйинини ўтказди. Бу Шацких учун миллий термадаги 61-ўйин бўлди – ўтган ўйинлар давомида у рақиблар дарвозасига 34 та гол уриб, миллий терма жамоа рекордчиси бўлиб турибди.
Футболчи айни вақтда фаолиятини Украинанинг «Говерла» клубида давом эттирмоқда. 35 ёшли Шацких камида яна бир мавсум футбол ўйнашни режалаштирмоқда.
