Namangan shahrida o‘tkazilayotgan o‘rta maxsus, kasb-hunar ta’limi tizimi o‘quvchilarining “Barkamol avlod—2014” sport musobaqalarida dastlabki g‘olib va sovrindorlari aniqlandi. Bu haqda O‘zA xabar berdi.
Namangan shahridagi “Barkamol avlod” sport majmuasida suzish bo‘yicha o‘smirlar va qizlar o‘rtasida kechgan bahslarda erkin usulda 50 metrga suzishda navoiylik Bahodir Egamov va andijonlik Shohsanam Toshpo‘latova, 200 metrga suzish bo‘yicha Toshkent viloyati vakili Artyom Puxnatiy va poytaxtlik Kseniya Fomicheva eng yaxshi natijani qayd etib, ilk oltin medalni qo‘lga kiritdi.
– Bugungi musobaqada g‘olib chiqish oson bo‘lmadi, – deydi Shohsanam Toshpo‘latova. – Mamlakatimizning turli hududidan kelgan sportchi tengdoshlarimiz bilan jiddiy kurashgan bo‘lsak-da, musobaqadan so‘ng fikr almashish va malakamizni oshirish imkoniga ega bo‘lganimizdan xursandmiz. Bu g‘alaba kelajakda yuksak marralarni zabt etishimda menga katta kuch-g‘ayrat bag‘ishlaydi.
200 metrga chalqancha suzish bahsida poytaxtlik Aleksandr Kurishev va andijonlik Rinata To‘xtasinova, 100 metrga brass usulida suzishda esa poytaxtlik Vladislav Mustafin va andijonlik Nodira Shamsuddinova g‘alaba qozondi.
– Suv sporti yurtimizda jadal rivojlanayotgan sport turlaridan, – deydi musobaqa bosh hakami Dmitriy Sutskarev. – Bu kabi musobaqalar mamlakatimiz terma jamoalari safini iqtidorli sportchilar bilan kengaytirishga xizmat qiladi. Ular orasida turli musobaqa g‘olib va sovrindorlarining borligi bahslarning keskin va murosasiz o‘tishini ta’minlamoqda.