Наманган шаҳрида ўтказилаётган ўрта махсус, касб-ҳунар таълими тизими ўқувчиларининг «Баркамол авлод—2014» спорт мусобақаларида дастлабки ғолиб ва совриндорлари аниқланди. Бу ҳақда ЎзА хабар берди.
Наманган шаҳридаги «Баркамол авлод» спорт мажмуасида сузиш бўйича ўсмирлар ва қизлар ўртасида кечган баҳсларда эркин усулда 50 метрга сузишда навоийлик Баҳодир Эгамов ва андижонлик Шоҳсанам Тошпўлатова, 200 метрга сузиш бўйича Тошкент вилояти вакили Артём Пухнатий ва пойтахтлик Ксения Фомичева энг яхши натижани қайд этиб, илк олтин медални қўлга киритди.
– Бугунги мусобақада ғолиб чиқиш осон бўлмади, – дейди Шоҳсанам Тошпўлатова. – Мамлакатимизнинг турли ҳудудидан келган спортчи тенгдошларимиз билан жиддий курашган бўлсак-да, мусобақадан сўнг фикр алмашиш ва малакамизни ошириш имконига эга бўлганимиздан хурсандмиз. Бу ғалаба келажакда юксак марраларни забт этишимда менга катта куч-ғайрат бағишлайди.
200 метрга чалқанча сузиш баҳсида пойтахтлик Александр Куришев ва андижонлик Рината Тўхтасинова, 100 метрга брасс усулида сузишда эса пойтахтлик Владислав Мустафин ва андижонлик Нодира Шамсуддинова ғалаба қозонди.
– Сув спорти юртимизда жадал ривожланаётган спорт турларидан, – дейди мусобақа бош ҳаками Дмитрий Суцкарев. – Бу каби мусобақалар мамлакатимиз терма жамоалари сафини иқтидорли спортчилар билан кенгайтиришга хизмат қилади. Улар орасида турли мусобақа ғолиб ва совриндорларининг борлиги баҳсларнинг кескин ва муросасиз ўтишини таъминламоқда.
Изоҳ (0)