Fransiyaning “Pari Sen-Jermen” futbol klubi Angliyaning “Manchester Yunayted” jamoasi futbolchisi Ueyn Runiga qiziqish bildirmoqda. Bu haqda The Daily Mail xabariga asoslanib “Kun” ma’lum qildi.
Fransuz klubi Manchesterdagi voqealar rivojini diqqat bilan kuzatib boradi va agar futbolchi jamoani tark etish istagini bildirsa, Angliya terma jamoasi hujumchisiga taklif bilan chiqadi.
Nashrning yozishicha, “Manchester Yunayted”ga Gollandiya terma jamoasi bosh murabbiyi Lui van Gal ustozlik qiladigan bo‘lsa, Runida jamoadan ketish istagi paydo bo‘lishi mumkin. Hozirgi vaqtda xabar berishlaricha, ingliz klubi bosh murabbiy o‘rniga “Real Madrid”ga ustozlik qilayotgan Karlo Anchelotti nomzodini ham ko‘rib chiqmoqda.
Runi yaqinda “Manchester Yunayted” bilan yangi shartnoma imzolagan edi. Daily Mail’ning qayd etishicha, futbolchining transferi “PSJ”ga 35 million funt sterlingga tushishi mumkin.
Joriy mavsumda Runi Angliya chempionati doirasidagi 29 uchrashuvda maydonga tushdi va 17 ta gol urishga muvaffaq bo‘ldi.
Avvalroq, “MYu”ga yangi bosh murabbiy tanlashda “qizil iblislar”ning ko‘p yillik sobiq ustozi ser Aleks Fergyusonning fikri hal qiluvchi bo‘lishi haqida xabar berilgan edi.
Izoh (0)