Франциянинг «Пари Сен-Жермен» футбол клуби Англиянинг «Манчестер Юнайтед» жамоаси футболчиси Уэйн Рунига қизиқиш билдирмоқда. Бу ҳақда The Daily Mail хабарига асосланиб «Кун» маълум қилди.

Француз клуби Манчестердаги воқеалар ривожини диққат билан кузатиб боради ва агар футболчи жамоани тарк этиш истагини билдирса, Англия терма жамоаси ҳужумчисига таклиф билан чиқади.

Нашрнинг ёзишича, «Манчестер Юнайтед»га Голландия терма жамоаси бош мураббийи Луи ван Гал устозлик қиладиган бўлса, Рунида жамоадан кетиш истаги пайдо бўлиши мумкин. Ҳозирги вақтда хабар беришларича, инглиз клуби бош мураббий ўрнига «Реал Мадрид»га устозлик қилаётган Карло Анчелотти номзодини ҳам кўриб чиқмоқда.

Руни яқинда «Манчестер Юнайтед» билан янги шартнома имзолаган эди. Daily Mail’нинг қайд этишича, футболчининг трансфери «ПСЖ»га 35 миллион фунт стерлингга тушиши мумкин.

Жорий мавсумда Руни Англия чемпионати доирасидаги 29 учрашувда майдонга тушди ва 17 та гол уришга муваффақ бўлди.

Аввалроқ, «МЮ»га янги бош мураббий танлашда «қизил иблислар»нинг кўп йиллик собиқ устози сер Алекс Фергюсоннинг фикри ҳал қилувчи бўлиши ҳақида хабар берилган эди.