Toshkentda shaxmat bo‘yicha erkaklar o‘rtasida o‘tkazilgan O‘zbekiston chempionati oliy ligasi musobaqalari yakunlandi. Unda FIDE ustasi Ulug‘bek Tillayev birinchi o‘rinni egalladi, deb xabar bermoqda O‘zA.
Bu yilgi musobaqada O‘zbekistonning eng kuchli to‘qqiz nafar shaxmatchisi bir davrali tizimda o‘zaro kuch sinashdi.
So‘nggi tur oldidan beshtadan ochko jamg‘argan xalqaro grossmeyster Aleksey Barsov va xalqaro toifadagi sport ustasi Jahongir Vohidov chempionlikka asosiy da’vogar edi. Lekin oxirgi partiyada o‘zaro raqobatlashgan peshqadam shaxmatchilar durang natija qayd etdi. Ularni ta’qib qilib kelayotgan Ulug‘bek Tillayev Bobur Sattorovni, Akmal Fayzullayev Nikita Xoroshevni yengib, ochkolar bo‘yicha peshqadamlarga yetib oldi.
Natijada chempionat yakunida to‘rt nafar shaxmatchi 5,5 dan ochko jamg‘argani bois g‘olib va sovrindorlar qo‘shimcha ko‘rsatkichlar bo‘yicha aniqlandi. Unga ko‘ra, Ulug‘bek Tillayev O‘zbekiston chempioni bo‘ldi. Aleksey Barsov kumush, Jahongir Vohidov bronza medal bilan taqdirlandi.
Xotin-qizlar o‘rtasidagi oliy liga bahslari esa hal qiluvchi pallaga kirdi. Musobaqa yakunlanishiga ikki tur qolganida uch nafar shaxmatchi 6,5 ochko bilan oltin medalga da’vogarlik qilmoqda.
To‘qqizinchi turda ikki peshqadam — “Umid nihollari—2012” g‘olibi Mohinur Qahramonova va O‘zbekistonning amaldagi chempioni Hulkar Tohirjonova raqiblari — Iroda Ibrohimova hamda Sevara Boymurodova bilan durang o‘ynadi. FIDE ustasi Sarvinoz Qurbonboyeva esa Osiyo o‘yinlari sovrindori Nodira Nodirjonovani yengib, ochkolar hisobida yetakchilarga yetib oldi.
Eslatib o‘tamiz, Toshkentda erkaklar va ayollar o‘rtasida shaxmat bo‘yicha O‘zbekiston chempionati 23-mart kuni start olgan edi.
Izoh (0)