O’zbekiston milliy terma jamoasi bosh murabbiyi Mirjalol Qosimov Gonkongga qarshi Osiyo Kubogi-2015 saralash o‘yinida maydonga tushadigan asosiy tarkibni e’lon qildi. Bu haqda O’FF matbuoti xizmatiga asoslanib, Kun.uz xabar bermoqda.
19-noyabr, seshanba kuni futbol bo‘yicha O‘zbekiston milliy terma jamoasi Osiyo Kubogi-2015 saralash “E” guruhi 5-tur uchrashuvlari doirasida safarda Gonkong terma jamoasiga qarshi maydonga tushadi. O‘yin Toshkent vaqti bilan 17:00da boshlanadi va O‘zMTRKning “Sport” telekanali orqali jonli efirda namoyish etilishi rejalashtirilgan.
Terma jamoa 15-noyabr kuni Osiyo Kubogi-2015 saralashi doirasida Vyetnamga qarshi maydonga tushib, 3:0 hisobida g‘alaba qozongan edi. O‘sha o‘yin bilan taqqoslaganda, terma jamoa asosiy tarkibida sezilarli o‘zgarishlar yuz bergan.
Jumladan, O’zbekiston milliy terma jamoasi sardori Server Jeparov bu safar asosiy tarkibga kiritilmagan. Shuningdek, o‘tgan o‘yinda zaxiradan maydonga tushgan himoyachi Islom To‘xtaxo‘jayev, yarim himoyachilar Jamshid Iskanderov va Sardor Rashidov asosiy tarkibga kiritilgan. Vetnamga qarshi o‘yinda milliy termada debyut qilgan va birinchi o‘yinidayoq gol urishga muvaffaq bo‘lgan “Buxoro” hujumchisi Vohid Shodiyev Gonkongga qarshi ham asosiy tarkibda to‘p suradi.
Tarkib quyidagicha ko‘rinish olgan – darvozabon: Eldor Suyunov (“Nasaf”); himoyachilar: Anzur Ismoilov (“Changchun Yatay”, Xitoy), Islom To‘xtaxo‘jayev (“Lokomotiv”), Davron Hoshimov (“Paxtakor”), Vitaliy Denisov (“Lokomotiv”, Rossiya); yarim himoyachilar: Aziz Haydarov (“Ash-Shabob”, BAA), Odil Ahmedov (“Anji”, Rossiya), Jamshid Iskanderov (“Paxtakor”), Sardor Rashidov (“Bunyodkor”); hujumchilar – Vohid Shodiyev (“Buxoro”), Igor Sergeyev (“Paxtakor”).
O‘zbekiston va Gonkong terma jamoalari o‘rtasida 6-fevral kuni Toshkentda bo‘lib o‘tgan dastlabki o‘yinda hisob ochilmagan edi. Biroq, O‘zbekiston milliy terma jamoasi bosh murabbiyi Mirjalol Qosimov fikricha, bo‘lajak o‘yin birinchisidan keskin farq qiladi va Toshkentdagi o‘yindan farqli ravishda, Gonkong bu safar hujum qilishiga to‘g‘ri keladi.
Eslatib o‘tamiz, agar O’zbekiston milliy terma jamoasi ushbu o‘yinda g‘alaba qozonsa, muddatidan avval Osiyo Kubogi-2015 final bosqichi ikkinchi yo‘llanmasini qo‘lga kiritadi. “E” guruhidagi dastlabki yo‘llanma BAAga nasib etgan, Vyetnam terma jamoasi esa yo‘llanmaga ega chiqish huquqidan mahrum bo‘lib ulgurgan, deb yozadi Kun.uz
Izoh (0)