Яқин Шарқдаги урушнинг 4-куни: Ар Риёддаги АҚШ элчихонасига дрон ҳужум қилди, Ливанда қуруқлик операцияси бошланди

Яқин Шарқдаги кескинлик тобора кенгаймоқда. 3 март куни Ар Риёддаги АҚШ элчихонасига дронлар ҳужум қилди, Исроил Ливанда қуруқлик операциясини бошлади, Америка фуқароларини минтақани тарк этишга чақирди. Европа давлатлари Эронни огоҳлантирди, Ўзбекистон эса парвозларни тўхтатиб, фуқароларни эвакуация қилмоқда.

Ар Риёддаги АҚШ элчихонасига дрон урилди

3 март тонгида Саудия Арабистонининг Ар Риёд шаҳридаги АҚШ элчихонасига иккита дрон келиб урилди. Саудия Мудофаа вазирлиги маълумотига кўра, объектда ёнғин чиққан ва “кичик моддий зарар” етган.

Reuters манбалари дипломатик квартал устида қора тутун кўтарилганини, кучли портлаш овози эшитилганини билдирган. АҚШ президенти Дональд Трамп ҳужум ва тўрт нафар америкалик ҳарбийнинг ўлдирилишига жавоб “тез орада ойдинлашишини” айтди.

Исроил Ливанда қуруқлик операциясини бошлади

Исроил мудофаа кучлари (САХАЛ) 3 март куни Ливанда “Ҳизбуллоҳ”га қарши қуруқликдан операциялар бошлаганини эълон қилди. Қўшинлар Ливан чегарасининг бир неча нуқталарига жойлаштирилган.

Операция Эрон олий раҳнамоси Оятуллоҳ Али Хоманаий ўлдирилганидан кейин кучайган тўқнашувлар фонида амалга оширилмоқда. “Ҳизбуллоҳ” Исроилга ҳужумларни “қасос” деб атаган.

АҚШ фуқароларини минтақани тарк этишга чақирди

АҚШ Давлат департаменти барча фуқароларини Яқин Шарқдаги ўндан ортиқ давлатни “ҳозироқ тарк этиш”га чақирди. Тавсия Баҳрайн, Миср, Эрон, Ироқ, Исроил, Иордания, Кувайт, Ливан, Уммон, Қатар, Саудия Арабистони, БАА, Сурия ва Яманга тааллуқли.

Иорданиядаги АҚШ элчихонаси ходимлари таҳдид сабаб дипломатик бинони тарк этган. Шу билан бирга, ракета ҳужумлари туфайли кўплаб тижорий рейслар тўхтатилгани эвакуацияни мураккаблаштирмоқда.

Испания АҚШ базаларидан фойдаланишга рухсат бермади

Испания ташқи ишлар вазири Хосе Мануэл Альбарес мамлакат ҳудудидаги Рота ва Морон ҳарбий базалари Эронга қарши операцияда ишлатилмаслигини маълум қилди.

Reuters хабарига кўра, зарбалар бошланганидан сўнг Испаниядаги базалардан АҚШнинг камида 15 та самолёти ҳавога кўтарилган. Улардан айримлари Германиядаги Рамштайн авиабазасига қўнган.

АҚШ Эрон дронига ўхшаш LUCAS’ни қўллади

АҚШ илк бор Эроннинг Shahed-136 дронига ўхшаш, Starlink терминаллари билан жиҳозланган янги LUCAS дронларидан фойдаланди.

Экспертлар уни “тескари муҳандислик” асосида яратилган модел деб баҳоламоқда. АҚШ Марказий қўмондонлиги эълон қилган суратларда дрон фюзеляжида тўртбурчак панеллар — эҳтимолий Starlink қурилмалари кўринади.

Исроил разведкаси Хоманаийга қарши операцияни 25 йил тайёрлаган

Financial Times маълумотига кўра, Исроил разведкаси “Арслон наъраси” операцияси доирасида Теҳрондаги йўл ҳаракати камераларини бузиб кирган ва Хоманаийнинг “ҳаёт тарзи” моделини сунъий интеллект ёрдамида таҳлил қилган.

Ҳисоботда Spаrrоw ракеталари қўллангани, АҚШ Марказий разведка бошқармаси суиқасд куни жойлашувни тасдиқлашда иштирок этгани айтилади.

Эрон Европани огоҳлантирди

Теҳрон расмийлари Европа давлатларини АҚШ ва Исроил операцияларига аралашмаслик ҳақида огоҳлантирди. Эрон ТИВ вакили Исмоил Бақоий ҳар қандай ҳарбий ҳаракат “уруш эълон қилиш билан тенг” бўлишини айтди.

Кипрдаги Британия авиабазасига дрон ҳужумидан сўнг Греция, Германия ва Франция орол мудофаасини кучайтиришга ваъда берди. НАТО бош котиби Марк Рютте альянс “ҳар бир қарич ҳудудни ҳимоя қилишини” таъкидлади.

Эрон ҳужумлари фонида БАА президенти Муҳаммад бин Зоид ал-Наҳаён ва Дубай валиаҳд шаҳзодаси Ҳамдан бин Муҳаммад Dubai Mall’да сайр қилиб, жамоат жойида кўриниш берди. Бу ижтимоий тармоқларда кенг муҳокама қилинди.

Ўзбекистон фуқаролари эвакуация қилинмоқда

“Дунё” хабарига кўра, Ўзбекистоннинг 13 нафар фуқароси Туркманистон орқали ватанга қайтарилди. Улар “Sarahs” чегара пости орқали хавфсиз кузатиб қўйилган.

Шунингдек, Яқин Шарқдаги вазият сабаб Ўзбекистон аэропортларидан Саудия Арабистони, БАА, Қатар, Эрон, Кувайт ва Исроилга рейслар вақтинча тўхтатилди. Махсус рейслар орқали йўловчиларни қайтариш ишлари давом этмоқда.

Дубайдан Тошкентга илк техник парвоз амалга оширилди. Centrum Air авиакомпаниясининг C6358 рейси йўловчиларсиз учирилди. Расмий рухсат олингач, қўшимча эвакуация рейслари ташкил этилиши маълум қилинди.