Эрон Американинг Яқин Шарқдаги ҳарбий объектларига расман тан олинганидан кўра каттароқ зарар етказган. Уларни тиклаш учун миллиардлаб доллар талаб этилади. Бу ҳақда NBC News телеканали ўз манбаларига таяниб хабар берди.
Таъкидланишича, 28 февраль куни АҚШ ва Исроил ҳарбий амалиётни бошлаганидан сўнг, Теҳрон бунга зудлик билан жавоб қайтариб, минтақадаги Қўшма Штатларга қарашли ўнлаб нишонларга, жумладан, авиация ангарлари, омборхоналар, учиш-қўниш йўлаклари, сунъий йўлдош алоқа инфратузилмаси, радиолокация тизимлари ва самолётларга зарбалар берган. Натижада Америка ҳарбий базалари “жиддий шикастланган”, етказилган зарар эса “оммага эълон қилинганидан анча каттароқ” бўлиб чиққан.
NBC News маълумотларига кўра, Америка маъмурияти хусусий сунъий йўлдош компанияларидан ўз базаларининг суратларига киришни ёпишни сўраган, бу эса зарар миқдорини баҳолашни қийинлаштирмоқда.
Қайд этилишича, Пентагоннинг Яқин Шарқдаги ҳарбий объектларнинг реал ҳолати ҳақида маълумот беришни истамаётгани, жумладан, Республикачилар партиясидан бўлган бир қатор қонунчиларнинг ҳам норозилигига сабаб бўлмоқда.
“Биз бир неча ҳафтадан буён бу борада саволлар бериб келяпмиз, бироқ Пентагон рекорд даражадаги бюджет сўраётганига қарамай, батафсил маълумот ололмаяпмиз”, деди АҚШ Конгресси аъзоларидан бирининг ёрдамчиси.
Аввалроқ АҚШ Эронга қарши урушда кунига қарийб 1 млрд доллар сарфлаётгани хабар қилинганди.
28 февраль куни АҚШ ва Исроил Эронга қарши ҳарбий амалиёт бошлаб, бир қатор шаҳарларга ҳаво зарбалари йўллаган эди. Ўша куни йўлланган зарбалар оқибатида Эрон олий раҳнамоси Али Хоманаий ҳалок бўлган. Бунга жавобан Эрон Исроил ҳудудига ракета зарбалари берган ва Форс кўрфази мамлакатларидаги Америка ҳарбий базаларига ҳужум қилган.
