Марказий Осиё давлатлари раҳбарлари ва АҚШ президенти Дональд Трамп иштирокидаги саммит 6 ноябрь куни Вашингтонда бўлиб ўтиши режалаштирилмоқда. Бу ҳақда Қозоғистон раҳбари Қосим-Жўмарт Тўқаевнинг матбуот хизмати хабар берди.
Маълум қилинишича, Тўқаев Трампга таклиф учун миннатдорлик билдирган.
Қозоғистон президенти АҚШ раҳбари Дональд Трампнинг ички ва ташқи сиёсатининг асосий мақсадларига қўшилишини, хусусан, соғлом фикр тамойиллари асосида анъанавий қадриятларни ҳимоя қилиш, шунингдек, Америка раҳбарининг тинчлик ва хавфсизликни таъминлашга бўлган интилишини қўллаб-қувватлашини таъкидлаган.Қозоғистон президенти Қосим-Жўмарт Тўқаев АҚШ президенти Дональд Трампга 6 ноябрь куни Вашингтонда бўлиб ўтадиган Марказий Осиё—АҚШ саммитида иштирок этиш учун юборилган таклиф юзасидан самимий миннатдорлик мактубини йўллади. Давлат раҳбари Америка етакчисининг ушбу ташаббусини ўз вақтида бўлган деб баҳолади, дейилади матбуот хизмати хабарида.
Саммит Трамп иштирокидаги биринчи шундай учрашув бўлади. Бундан олдин Марказий Осиё давлатлари раҳбарлари 2023 йил сентябрида “C5+1” форматида ўша пайтдаги АҚШ президенти Жо Байден билан учрашган эди.
Сентябрь ойи охирида Нью Йорк шаҳрида Ўзбекистон раҳбари АҚШ президенти Дональд Трамп билан учрашганди. Давлат раҳбарлари Ўзбекистон—АҚШ стратегик шериклик муносабатларини янада ривожлантириш ва амалий ҳамкорликни кенгайтиришга келишганди.
Сентябрь ойи бошида эса Ўзбекистон президенти Шавкат Мирзиёевнинг АҚШ президенти Дональд Трамп билан телефон орқали мулоқоти бўлиб ўтди. Телефон мулоқоти чоғида президентлар Марказий Осиё давлатлари ва АҚШнинг “C5+1” шаклидаги минтақавий ҳамкорлигини чуқурлаштириш юзасидан ҳам фикр алмашган.
