Шавкат Мирзиёев Вашингтон шаҳрига ташриф доирасида 5 ноябрь куни ўзига ажратилган қароргоҳда АҚШ Конгресси Вакиллар палатаси аъзолари Билл Хайзенга, Керол Миллер ва Сидни Камлагер-Давни қабул қилди.
Президент матбуот хизматининг хабар қилишича, Ўзбекистон билан АҚШ ўртасидаги стратегик шериклик муносабатларини янада мустаҳкамлаш, икки мамлакат парламентларининг амалий ҳамкорлигини кенгайтириш масалалари кўриб чиқилди.
Қонун чиқарувчи органлар ўртасидаги алоқалар ривожланиб бораётгани, АҚШ Конгрессида Ўзбекистон билан ҳамкорлик бўйича кокус самарали фаолият олиб бораётгани қайд этилди. Ҳар йили Вакиллар палатасида кокус кўмагида икки томонлама муносабатларни мустаҳкамлашга хизмат қилаётган Ўзбекистон кунлари ўтказиб келинмоқда.
Конгресс олий даражада эришилган, энг аввало, савдо-иқтисодий, инвестициявий ва маданий-гуманитар алоқаларни кенгайтиришга доир келишувларни амалга оширишга ҳар томонлама кўмаклашиши муҳим экани таъкидланди.
Ҳудудлараро алоқаларни кенгайтириш, конгрессменлар вакиллик қилаётган Ғарбий Виржиния, Мичиган ва Калифорния штатлари билан амалий ҳамкорликни йўлга қўйишга алоҳида эътибор қаратилди.
Учрашув якунида АҚШ Конгресси вакилларининг Ўзбекистонга ташрифини уюштириш, шунингдек, икки мамлакат ҳудудлари раҳбарлари бошчилигидаги ишбилармон доиралар делегацияларининг ўзаро ташрифларини ташкил этишга келишиб олинди.
Шавкат Мирзиёев АҚШ президенти Дональд Трампнинг таклифига биноан 4 ноябрь куни Вашингтон шаҳрига келганди. Ташриф давомида президент Дональд Трамп билан учрашади ҳамда Марказий Осиё мамлакатлари ва АҚШ етакчиларининг “C5+1” форматидаги саммитида иштирок этади.
Саммит Трамп иштирокидаги биринчи шундай учрашув бўлади. Бундан олдин Марказий Осиё давлатлари раҳбарлари 2023 йил сентябрида “C5+1” форматида ўша пайтдаги АҚШ президенти Жо Байден билан учрашган эди.
Сентябрь ойи бошида Шавкат Мирзиёев Дональд Трамп билан телефон орқали мулоқот қилиб, Марказий Осиё давлатлари ва АҚШнинг “C5+1” шаклидаги минтақавий ҳамкорлигини чуқурлаштириш юзасидан фикр алмашганди. Сентябрь ойи охирида эса Нью Йоркда Ўзбекистон раҳбари АҚШ президенти Дональд Трамп билан учрашганди. Давлат раҳбарлари Ўзбекистон—АҚШ стратегик шериклик муносабатларини янада ривожлантириш ва амалий ҳамкорликни кенгайтиришга келишганди.
