Ўзбекистонда кўп квартирали уйларни рухсатномасиз қуриш учун жавобгарлик кучайтирилди.
Президент 28 сентябрда имзолаган қонун билан қурилиш соҳасида давлат назорати ва бошқарувини янада такомиллаштиришга қаратилган ўзгартириш ва қўшимчалар киритилди.
“Лицензиялаш, рухсат бериш ва хабардор қилиш тартиб-таомиллари тўғрисида”ги қонунга киритилган ўзгартишларга кўра, қурилиш-монтаж ишларини бошлаш учун қурилиш ва уй-жой коммунал хўжалиги соҳасида назорат қилиш ҳудудий инспекцияларидан рухсатнома олиш талаб этилади.
Жиноят кодексига киритилган ўзгартиришларга кўра, кўп квартирали уйларни қурилиш ва уй-жой коммунал хўжалиги соҳасида назорат қилиш инспекцияларининг рухсатномасисиз қуриш, шундай ҳаракатлар учун маъмурий жазо қўлланилганидан кейин содир этилган бўлса, 3 йилдан 5 йилгача озодликдан маҳрум қилиш билан жазоланиши белгиланди.
Шунингдек, шаҳарсозлик тўғрисидаги қонунчиликни бузиш одам ўлишига ёхуд бошқа оғир оқибатларга сабаб бўлса, 5 йилдан 7 йилгача озодликдан маҳрум қилиш билан жазоланиши белгиланди.
Қонун расмий эълон қилинган кундан эътиборан уч ой ўтгач, кучга киради.
Ўзбекистонда кўп квартирали уй-жойларни рухсатсиз қурганлик учун жавобгарлик чораларини кучайтириш назарда тутилган қонун лойиҳаси Олий Мажлис Қонунчилик палатасининг 13 январдаги мажлисида биринчи ўқишда қабул қилинганди. Сенат томонидан 9 июлда маъқулланганди.
Ўзбекистонда 2026 йил 1 июндан қурилиш соҳасида экологик талаблар ҳам кучайтирилганди. Ёнувчанлик даражаси юқори бўлган қурилиш материалларидан фойдаланиш бўйича айрим чекловлар белгиланганди.
