АҚШнинг Жанубий ва Марказий Осиё бўйича махсус элчиси Сержио Гор бир йилдан камроқ вақти ичида Ўзбекистонга иккинчи марта ташриф буюради. Бу ҳақда АҚШ Давлат департаменти хабар берди.
Маълум қилинишича, махсус элчи 3–7 февраль кунлари Қирғизистон ва Ўзбекистонга ташриф буюради. Сержио Гор Қирғизистоннинг Бишкек шаҳрида бўлиб ўтадиган B5+1 бизнес-форумида иштирок этади. Форум доирасида у Қозоғистон, Қирғизистон, Тожикистон, Туркманистон ва Ўзбекистон ҳамда АҚШдан келган юқори лавозимли тадбиркор ва сиёсатчилар билан учрашади.
Гор муҳокамаларда АҚШ ва минтақа ўртасидаги ҳамкорликни ривожлантиришда хусусий секторнинг ролига эʻтибор қаратади. Шунингдек, у Бишкек ва Тошкент шаҳарларида юқори мартабали расмийлар билан учрашиб, икки томонлама ҳамкорликни кенгайтириш имкониятларини муҳокама қилади.
“АҚШ Қирғизистон ва Ўзбекистон билан яқин иқтисодий алоқаларни ривожлантириш, бутун минтақада барқарорлик ва фаровонликка хизмат қиладиган инновацион шерикликни ривожлантириш тарафдори”, дейилади Давлат департаменти сайтида.
Маʻлумот ўрнида, Сержио Гор 2025 йил октябрь ойида Тошкентга ташриф билан келган эди. Ўшанда у президент Шавкат Мирзиёев, Президент администрацияси раҳбари Саида Мирзиёева ва бошқа расмий шахслар билан учрашганди. У ноябрь ойида янги ташкил этилган АҚШ—Ўзбекистон ишбилармонлик ва инвестиция кенгашининг ҳамраиси бўлганди.
- Сержио Гор 1986 йил 30 ноябрда Тошкентда туғилган. Унинг ўша пайтдаги тўлиқ исми Сергей Гороховский бўлган. Буни унинг адвокати Роберт Гарсон ҳам тасдиқлаган. Болалигида Горнинг оиласи АҚШга кўчиб кетган, бу ерда у Америка фуқаролигини олган ва кейинчалик сиёсатчига айланган.
Хусусан, у республикачилар партиясидан сенатор Ренд Полнинг офисида ишлаган, 2020-йилда эса ўша йили иккинчи муддатга қайта сайлана олмаган Трампнинг сайловолди кампанияси молия қўмитасида аппарат раҳбари лавозимини эгаллаган. Шунингдек, Гор кичик Дональд Трамп билан бирга Wиннинг Теам Публишинг консерватив нашриётининг ҳаммуассиси ҳисобланган..
