АҚШнинг Diversity Visa (DV-2027) лотереясида иштирок этиш учун ариза бериш тартибига техник ўзгаришлар киритилмоқда. Бу ҳақда Давлат департаменти хабар берди.
DV-2027 натижаларини рўйхатдан ўтказиш ва эълон қилишнинг бошланиш саналари тез орада эълон қилинади. Ўзгаришлар ташкилий характерга эга бўлиб, дастурнинг ўзига таъсир қилмайди. Ушбу ўзгаришлар DV-2027 учун танланган шахсларнинг виза топшириш муддатига таъсир кўрсатмайди. Бу муддат 2026 йил 1 октябрдан 2027 йил 30 сентябргача ўзгаришсиз қолади.
Diversity Visa дастури ҳар йили АҚШга миграция даражаси паст бўлган мамлакатлар ўртасида 50 мингга яқин визаларни тарқатади. Натижаларни текшириш Entry Status Check (ESC) тизими орқали амалга оширилади.
2025 йилда Ўзбекистон ғолиблар сони бўйича (5,5 минг киши) биринчи ўринни эгаллаганди. Кейинги ўринларда Қирғизистон (3 минг), Тожикистон (2,9 минг) ва Қозоғистон (2 минг) бўлган. 16 сентябрдан бошлаб лотереяда иштирок этиш учун 1 доллар тўлаш кераклигини маълум қилди.
Аввал қандай эди?
Аввал харажатлар фақатгина ғолиб бўлган иштирокчилар томонидан тўланадиган 330 доллар миқдоридаги тўловга киритилганди. Эндиликда эса, 1 доллар тўлов барча иштирокчиларга татбиқ этилади, бу эса харажатни кўпчилик орасида тенг тақсимлашга хизмат қилади.
Давлат департаменти бу ўзгариш сохта рўйхатдан ўтиш ҳолатларини камайтиришига урғу бермоқда, яъни лотереядан фойда кўришга уринаётган фирибгарлар сони қисқариши кутилмоқда.
Green Card ўзи нима?
Green Card чет эл фуқароларига АҚШда расман ишлаш имконини берувчи шахсни тасдиқловчи ҳужжатдир. Бу виза лотереяси бўлиб, унда иштирок этиш учун талабгорлардан махсус аризани тўлдириш талаб этилади. Ҳар йили бутун дунё бўйлаб минглаб аҳоли лотереяни ютиб олади ва АҚШга расман кўчиб ўтиш имкониятига эга бўлади. Ариза бериш жараёни тахминан октябрь ойида бошланса, натижалар май ойларида эълон қилинади. Бундан муваффақиятли ўтган шахслар навбатдаги жараёнда, яъни ҳақиқий картани олиш учун ҳам бир неча ой кутишига тўғри келади.
Green Card лотереяси DV-2027 деб номланади, чунки у лотерея ғолибларига иммиграцион DV визалари бериладиган молиявий йилни (Fiscal Year) кўрсатади. Америкада молия йили 1 октябрда бошланиб, 30 сентябрда тугайди.
