Shavkat Mirziyoyev Toshkent shahridagi 1-bolalar musiqa va sanʼat maktabini ko‘zdan kechirdi. Bu haqda Prezident matbuot xizmati xabar berdi.
Maktab o‘tgan yili respublika byudjeti mablag‘lari hisobidan bunyod etilgan. 250 o‘quvchiga mo‘ljallangan. Joriy o‘quv yilida 1-sinfga 145 nafar o‘g‘il-qiz qabul qilingan.
Bu yerda yoshlar 12 yo‘nalish bo‘yicha maktabdan tashqari taʼlim oladi. O‘quvchilar ijodiy imtihonlar asosida saralab olinadi.
Ellikka yaqin o‘quv va kompyuter xonalari, tadbirlar zalida shinam sharoitlar yaratilgan. Kutubxonada 5 ming 500 dan ortiq o‘quv adabiyoti va notalar jamlangan.
Prezident sanʼat maʼnaviy boy avlodni tarbiyalashga xizmat qilishini, bunga mehrni bolalikdan boshlab shakllantirish zarurligini taʼkidladi. Shu maqsadda umumiy taʼlim tizimi bilan musiqa taʼlimi dasturlarini uyg‘unlashtirish muhimligi aytildi. Sanʼat maktablari bilan oliygohlar, teatrlar va boshqa madaniyat muassasalarining hamkorligi tizimini kuchaytirish vazifasi qo‘yildi.
Mamlakatda barcha maktablar cholg‘u asboblari bilan taʼminlanib, yoshlarning qiziqish va isteʼdodi rivojlantirilmoqda. Bu anʼanaviy sanʼat yo‘nalishlari bilan birga maqom, baxshichilik va mumtoz musiqa qadriyatlarimizni davom ettirishga xizmat qiladi.
Izoh (0)