“Rakurs” podkastining navbatdagi sonida xalqaro jurnalist Sohiba Hayot mehmon bo‘ldi. U bilan migrant ayollar va ular duch keladigan qiyinchiliklar haqida suhbatlashildi. Podkast davomida u jurnalistikadan ketib migrantlikni tanlashga majbur bo‘lgani, ayollarning taʼqiblarga uchrashi va viza olish umidida xorijlik erkaklarga turmushga chiqayotgan hamyurtlarimiz haqida gapirdi.
“Jurnalistikadan ketishga majbur bo‘lganman”
— Universitetni tamomlagach, Favqulodda vaziyatlar vazirligiga qarashli “Vaziyat” gazetasida ish boshlaganman. Oila qurib, bir o‘g‘lim bilan ajrashganman. O‘zbek jamiyatida negadir farzand faqat ona bilan qoladi va uning bor masʼuliyati faqat unga tegishli degan qarash bor. Farzandimni boqish va ehtiyojlarini qondirish uchun 3-4 joyda ishlashimga to‘g‘ri kelgan. Toshkentda ijarada yashardik va kam oylikni yetkazish juda qiyin edi. Yetti yil davomida hammasidan charchadim, chunki yolg‘iz onaga kam oylik evaziga ko‘p ish qilish juda qiyin. Jurnalist maoshiga uy olib bo‘lmasligini tushunganimdan keyin, muhojirlikka ketishga qaror qilganman, deydi Sohiba Hayot.
“Egasiz ayollar migrant bo‘ladi”
— Egasiz ayollargina migrantlikka rozi bo‘ladi. Chunki oilasini, yurtini tashlab, ish izlab ketishiga egasi yo‘l qo‘ymaydi. Egasi deganda faqat turmush o‘rtog‘ini tushunmaslik kerak. Ayolning oilasi buzilgan bo‘lishi mumkin, ammo uning aka-ukasi, qon-qarindoshi yo‘qmi? Nahotki, moddiy yordam berolmagan taqdirda ham ruhan qo‘llab-quvvatlab, uni o‘z yurtida olib qolishga harakat qilishmasa? Chet elga chiqib ishlash qanchalar qiyinligini muhojirlik nonini totgan insonlar yaxshi bilishadi. Qiyinchilik har qanday yurtda bo‘ladi, ammo hamma ham muhojirlikni tanlayotgani yo‘q-ku?! Nazarimda bu yo‘lni tanlaganlar dilida xafaligi bor insonlar, ular ketib hammasini qaytadan boshlashga umid qilishadi. Afsuski, hamma yerda ham muhojirni iliq qarshi olishmaydi, u uchraydigan qiyinchiliklarni so‘z bilan taʼriflab bo‘lmaydi.
Masalan, men ham Rossiyada ancha yil o‘z soham bo‘yicha ishlolmaganman. Oliy maʼlumotli bo‘lishimga qaramay, hamma migrantlar singari oshxonada ishlashdan boshlaganman. Undan keyin uy xizmatchiligini ham qilganman. Hojatxona tozalab o‘tirganimda yig‘lab yuborganman, nahotki shu ishni qilish uchun besh yil o‘qigan bo‘lsam degandim, deydi Sohiba Hayot.
“Zo‘rlangan, tahqirlangan ham ayol”
— Ishlab kichkina noutbuk olganman. Rossiyadagi o‘zbeklarning ko‘pchiligi rus tilini bilmaydi, qonunlarni ham tushunmaydi. Kasbimga sadoqatim sabab oshxonada ishlasam ham ijtimoiy tarmoqlarga migrantlar uchun kerakli maʼlumotlarni ulashib borardim. Keyinchalik qiyin vaziyatga tushib qolgan ayollar ham yordam so‘rab murojaat qilishni boshlashdi. Shunaqa voqealarni eshitdimki, bu ishni nahotki inson qilgan bo‘lsa dedim. Dala hovlida tozalash ishlari borligi haqida yozishadi, agar muhojir ayol borsa, qorovuli uni tahqirlaydi, zo‘rlaydi. Eng alam qiladigani o‘sha qorovulning o‘zi ham muhojir, u o‘z yurtida onasi tengi ayolga bunday munosabatda bo‘lmaydi. Til bilmaslik, qonunlarni tushunmaslik, nolegal yoki andishaning kuchli ekanligi sabab aksariyat ayollar tegishli tashkilotlarga ham murojaat qilolmaydi, deydi Sohiba Hayot.
Quyidagi havola orqali YouTube’dagi “Daryo media” kanaliga tashrif buyurishingizni va podkastni to‘liq tomosha qilishingizni tavsiya qilamiz.
Izoh (0)