AQSH bir oy ichida Buyuk Britaniyaga kamida 20 ta yadro bombasi joylashtirgan bo‘lishi mumkin — ICAN

AQSH katta ehtimol bilan iyul oyida Sharqiy Angliyaning asosiy aviabazasi Leykenxitga kamida 20 ta B61-12 yadro bombasini joylashtirgan. Bu haqda Yadro qurolini yo‘q qilish bo‘yicha xalqaro kampaniya (ICAN) OAV bo‘limi rahbari Alister Bernett ma’lum qildi.

Iyul oyida UK Defence Journal nashri AQSH 17 yil ichida birinchi marta Buyuk Britaniyadagi Leykenxit aviabazasiga yadro qurolini joylashtirgani haqida xabar bergan edi. ICAN bu ma’lumotni tasdiqlaydi.

“NukewatchUK tashkiloti AQSHning iyul oyida Sharqiy Angliyadagi asosiy Leykenxit aviabazasiga yadro qurolini qaytargani haqida juda ishonchli dalillar taqdim etdi. U yerda joylashtirilgan samolyotlarni hisobga olsak, bular shubhasiz B61-12 yadro bombalaridir. ICAN va boshqa ekspertlar AQSH olimlar federatsiyasi aviabazaning ushbu bombalarni saqlash uchun modernizatsiya qilinayotganini ma’lum qilganidan so‘ng bir yildan ortiq vaqt davomida bu qadamni bashorat qilishgan edi”, dedi Bernett.

Bernet iyul oyida Leykenxit aviabazasiga qancha jangovar boshchalar joylashtirilgan bo‘lishi mumkinligi haqidagi savolga javob berar ekan, u kamida yigirmata bo‘lishi mumkinligini taxmin qilgan.

“Yadro quroli bilan bog‘liq o‘ta maxfiylikni hisobga olsak, ular qancha jangovar boshcha o‘rnatganini aytish qiyin. Taxminiy hisob-kitoblarga ko‘ra, hozirda AQSHning NATOga a’zo boshqa beshta davlatda saqlanayotgan 100 ga yaqin bombasi bor. Ehtimol, Buyuk Britaniyada ularning soni kamida 20 tadir”, dedi agentlik suhbatdoshi.

1954-yilda Sovuq urush avjiga chiqqan paytda Leykenxit aviabazasi Amerika yadro qurollarini joylashtirish obyektlaridan biri sifatida tanlangan, u yerda 2008-yilgacha 110 ta yadro bombasi saqlangan, keyinchalik yadro urushi xavfi kamayishi sababli olib ketilgan.

Yadro qurolini yo‘q qilish bo‘yicha xalqaro kampaniya (International Campaign to Abolish Nuclear Weapons, ICAN) 2007-yilda tashkil etilgan xalqaro jamoat tashkiloti hisoblanadi. U Yadro qurolini taqiqlash to‘g‘risidagi shartnomaning tasdiqlanishi va bajarilishiga ko‘maklashishni o‘z oldiga maqsad qilib qo‘ygan. Tashkilot 2017-yilda Tinchlik bo‘yicha Nobel mukofotiga sazovor bo‘lgan.