AQSH prezidenti Donald Tramp noqonuniy migrantlarga qarshi kurashish uchun Meksika bilan devorni qora rangga bo‘yashni buyurdi. Bu haqda CBS News xabar berdi.
Ichki xavfsizlik vaziri Kristi Noem 19-avgust kuni Nyu-Meksiko shtatidagi devor qismini ko‘zdan kechirdi.
AQSH va Meksika chegarasidagi butun devor yanada issiqroq bo‘lishi va noqonuniy immigratsiyani to‘xtatishi uchun qora rangga bo‘yaladi, dedi Noem.
U tegishli qaror AQSH prezidentining maxsus talabi ekanini ta’kidladi. Bu “g‘oya”ning muallifi va ishlar qachon tugallanishi haqida aniq ma’lumot berilmagan.
Prezident issiq ob-havoda qora rang kuchli qizdirishini va odamlar devordan oshib o‘tishi ancha qiyinlashishini yaxshi tushunadi, dedi Ichki xavfsizlik vaziri.
Uning fikricha, metall devorni qora rangga bo‘yash chegaraning narigi tomonida turgan odamlarning AQSHga noqonuniy kirish istagini kamaytiradi. AQSH chegara xizmati rahbari Mayk Benks esa bo‘yoq zanglashning oldini olishga ham yordam berishini aytmoqda.
AQSHga noqonuniy muhojirlar oqimi o‘n barobarlarga kamaydi
Meksika bilan chegara devorini qurish Trampning birinchi prezidentlik muddati davrida immigratsiya siyosatining asosiy yo‘nalishi bo‘lgan. Ikkinchi muddatida esa prezident ko‘proq migrantlarni deportatsiya qilish dasturlariga e’tibor qaratdi. Bu maqsad uchun Ichki xavfsizlik vazirligiga qariyb 46 mlrd dollar (taxminan 40 mlrd yevro) ajratilishi belgilangan.
Telejurnalistlar ta’kidlashicha, Tramp ma’muriyati devor qurilishini yakunlashda qat’iy turibdi. Ularning ma’lumotiga ko‘ra, 2025-yil iyun oyida AQSHning janubiy chegarasida atigi 6 mingdan sal ko‘proq kishi qo‘lga olingan. Bu so‘nggi o‘n yilliklardagi eng past ko‘rsatkich hisoblanadi.
Izoh (0)