Toshkent shahrida bitta kafeda ovqatlangan 23 kishi zaharlanib, shifoxonaga yotqizildi. Bu haqda Sanepidqo‘mita axborot xizmati xabar berdi.
Keltirilishicha, 6-8-sentyabr kunlari ovqatdan zaharlanish belgilari bilan jami 23 nafar fuqaro, shulardan 22 nafari Epidemiologiya, mikrobiologiya, yuqumli va parazitar kasalliklar ilmiy-amaliy tibbiyot markazi klinikasiga hamda 1 nafari Toshkent shahar 4-son yuqumli kasalliklar shifoxonasiga joylashtirildi.
Dastlabki ma’lumotlarga ko‘ra, ularning barchasi 5-sentyabr kuni Yunusobod tumanida joylashgan “Muhteshem doner” kafesida bir necha turdagi taomlarni iste’mol qilgani ma’lum bo‘ldi. Olib borilgan davolash muolajalari natijasida bemorlarning ahvoli yaxshilangan va 12-sentyabr 09:00 holatiga ko‘ra ularning 13 nafariga uyiga ruxsat berilgan.
Qolgan 10 nafar bemorlarga davolash muolajalari davom ettirilmoqda va kasallik dinamikasida ijobiy o‘zgarishlar kuzatilmoqda. Barcha bemorlarning ahvoli qoniqarli holatda.
Bugungi kunga kelib Sanepidqo‘mning Toshkent shahar boshqarmasi tomonidan kafe faoliyati vaqtincha to‘xtatilgan, iste’mol qilingan oziq-ovqat mahsulotlari qoldiqlaridan namunalar olinib, laboratoriya tekshiruvlari davom ettirilmoqda.
Birlamchi epidemiologik surishtiruv natijalariga ko‘ra, zaharlanishga kafeda tayyorlangan sous (bemorlarning barchasi iste’mol qilgan mahsulot) sabab bo‘lgan bo‘lishi mumkin degan xulosaga kelinmoqda.
Izoh (0)